گورنرسندھ نے عمر کوٹ میں احساس سیلانی لنگر سینٹر کا افتتاح کردیا

کراچی:گورنر سندھ عمران اسماعیل نے عمر کوٹ شہر کا دورہ کیا، اراکین صوبائی اسمبلی حلیم عادل شیخ، پاکستان تحریک انصاف کراچی کے سینئر نائب صدر اور مشیر ساحلی امور محمود مولوی،عزیز جی جی اورمشیر گورنر سندھ علی جونیجو بھی ان کے ہمراہ موجود تھے۔اس موقع پر گورنرسندھ نے عمر کوٹ میں احساس سیلانی لنگر سینٹر کا افتتاح کیا۔

افتتاحی تقریب سے خطاب کرتے ہوئے گورنر سندھ نے کہا کہ احساس پروگرام سماجی شعبہ میں ملک کی تاریخ کا سب سے بڑا پروگرام ہے،وزیر اعظم عمران خان کی جانب سے شروع کئے گئے اس پروگرام کا مقصد مستحق اور ضرورت مند افراد کی مدد کرنا ہے اوراحساس لنگر سینٹرز بھی اسی مقصد کے تحت قائم کئے جارہے ہیں۔

Visited Umerkot with Governor Sindh @ImranIsmailPTI. Inaugurated 'Ehsaas Saylani Langar Khana'. Providing food to poor top most priority of govt. It will reduce problems of poor segments of society. pic.twitter.com/vAQFpvzJF4

— Mahmood Moulvi (@MoulviMahmood) June 29, 2020

انہوں نے مزید کہا کہ صوبہ میں احساس کیش کی تقسیم بھی کامیابی سے جاری ہے صوبہ کے تمام اضلاع میں احساس۔سیلانی لنگر سینٹرز قائم کریں گے۔بعد ازاں میڈیا سے گفتگو کرتے ہوئے گورنرسندھ نے کہا کہ آج عمر کوٹ میں لنگر سینٹر کا افتتاح کردیا گیا ہے اب اس سینٹر میں غریب افراد دو وقت کا کھانا کھا سکیں گے اور یہی ریاست مدینہ کا وژن بھی ہے کہ کوئی شخص بھی بھوکا نہ سو سکے۔

اس وقت لنگرکھاناکی جگہ پر 500 افراد کے کھانا کھانے کی گنجائش ہے اس لئے صوبائی حکومت سے درخواست کریں گے کہ وہ اس کار خیر کو بڑھانے کے لئے کم از کم 1500 افراد کے کھانا کھانے کی جگہ کا بندوبست کرے،اسی طرح صوبہ کے دیگر اضلاع میں بھی لنگر کھانا کھولنے کی خواہش ہے، اگر صوبائی حکومت نے جگہ فراہم کی تو احساس پروگرام، سیلانی کے ساتھ مل کر ہر ضلع میں لنگر سینٹرز قائم کرسکتا ہے۔

کراچی اسٹاک ایکس چینج پر دہشت گرد حملہ کے حوالہ سے پوچھے گئے ایک سوال کا جواب دیتے ہوئے گورنرسندھ نے کہا کہ یہ بیرونی عناصر کی سازش لگتی ہے کیونکہ ملک دشمن قوتیں نہیں چاہتیں کہ پاکستان ترقی کرے اس وقت پوری دنیا کورونا وائرس کی لپیٹ میں ہے اور اس وائرس سے ہر ایک ملک کی معیشت بری طرح سے متاثر ہورہی ہے لیکن پاکستان کی معیشت پر اس کا اثر کم ہے۔

انہوں نے کہا کہ اس کے برعکس امریکہ کی معیشت پر منفی 8، اٹلی، اسپین کی معیشت پر منفی 12 اور دنیا میں سب سے پہلے کورونا فری ملک نیوزی لینڈ کی معیشت بھی منفی 4 فیصد متاثر ہوئی اس سے اندازہ لگایا جا سکتا ہے کہ کورونا وائرس نے ملکی معیشت کو زیادہ متا ثر نہیں کیاجو کہ اللہ تعالیٰ کا ہمارے پر خاص کرم ہونے کے ساتھ ساتھ وزیر اعظم کی معاشی پالیسی کا نتیجہ ہے۔

انہوں نے مزید کہا کہ اپوزیشن جماعتیں مخالفت برائے مخالفت کے ایجنڈے پر کاربند ہیں یہ لوگ عوام کی خدمت کرنے کے بجائے دیگر ایشوز پر اپنا وقت ضائع کررہے ہیں اور نیب جب انھیں طلب کرتا ہے تو یہ لوگ بیمار ہو جاتے ہیں ایک بات واضح کردوں کہ کوئی کتنا شوربھی مچا لے لیکن نیب کی جانب سے احتساب کا عمل بلا تعطل جاری رہے گااور یہ کسی صورت رکنے والا نہیں۔

انہوں نے کہا کہ اس وقت نیب میں 90 فیصد سے زائد کیسز موجودہ حکومت سے پہلے کے ہیں اور اب یہ تمام کیسز تحقیقات کے بعد حتمی مراحل میں ہیں اس وقت اپوزیشن کا احتجاج کھسیانی بلی کھمبا نوچے کے مترادف ہے۔

معلوم نہیں یہ لوگ کس قسم کا بجٹ چاہتے ہیں حالانکہ نئے بجٹ میں تو کوئی ٹیکس تک نہیں لگا۔ عمر کوٹ میں نہری پانی کی تقسیم کے ضمن میں کئے گئے سوال کے جواب میں کہا کہ اس معاملہ پر متعلقہ حکام سے بات کروں گا۔