گوگل نیوز پر ہمیں فالو کریںکراچی: کورنگی کے علاقے میں پیش آنے والے ایک افسوسناک حادثے میں چار سالہ بچی زندگی کی بازی ہار گئی، جب ایک مزدا ٹرک نے اسے روند ڈالا۔
یہ واقعہ پیر کی رات کورنگی انڈسٹریل ایریا کے مہران ٹاؤن، جلال چوک کے قریب پیش آیا، جب رُخسانہ نامی کمسن بچی افطار سے قبل اپنے گھر کے باہر کھیل رہی تھی۔
پولیس کے مطابق ڈرائیور زاکر نے ٹرک ریورس کرتے ہوئے غلطی سے بچی کو ٹکر مار دی جس کے نتیجے میں وہ موقع پر ہی دم توڑ گئی۔
ایس ایچ او کورنگی انڈسٹریل ایریا خالد میمن نے حادثے کی تصدیق کرتے ہوئے بتایا کہ پولیس فوری طور پر جائے وقوعہ پر پہنچی، ڈرائیور کو گرفتار کر کے ٹرک ضبط کر لیا گیا۔
حکام نے موقع سے شواہد اکٹھے کیے اور عینی شاہدین کے بیانات قلمبند کر لیے تاکہ حادثے کی مکمل تفصیلات اور ذمہ داری کا تعین کیا جا سکے۔
بچی کی میت کو ایدھی ایمبولینس کے ذریعے جناح اسپتال منتقل کر دیا گیا جہاں مزید قانونی کارروائی مکمل کی گئی۔ جاں بحق ہونے والی رخسانہ اپنے تین بہن بھائیوں میں سب سے بڑی تھی۔
اس سے قبل گورنر سندھ کامران ٹیسوری نے اعلان کیا تھا کہ ڈمپر حادثات میں جاں بحق ہونے والے افراد کے اہلخانہ کو رہائشی پلاٹ دیے جائیں گے۔
کراچی میں ایک پریس کانفرنس کے دوران انہوں نے کہا کہ روزانہ قرعہ اندازی کے ذریعے پلاٹ الاٹ کیے جائیں گے اور منتخب خاندانوں کو اسی دن بلڈرز کی جانب سے پراپرٹی فائل فراہم کر دی جائے گی۔
