گرے لسٹ سے اخراج کیلئے ایف اے ٹی ایف ٹیم کے دورے کے منتظر ہیں۔بلاول

اسلام آباد: وزیر خارجہ بلاول بھٹو زرداری نے فنانشل ایکشن ٹاسک فورس کے فیصلے کو سراہتے ہوئے کہا ہے کہ گرے لسٹ سے اخراج کیلئے ایف اے ٹی ایف ٹیم کے دورے کے منتظر ہیں۔ 

تفصیلات کے مطابق ایف اے ٹی ایف کسی بھی ملک کو گرے لسٹ سے نکالنے سے قبل اپنی ٹیم کو دورے کیلئے روانہ کرتا ہے۔ وزیر خارجہ نے انسداد منی لانڈرنگ اور دہشت گردی کی مالی معاونت کو عالمی معیارات کے ساتھ ہم آہنگ کرنے کے لیے پاکستان کے عزم کا اعادہ کیا۔

یہ بھی پڑھیں:

مختلف شہروں میں بارش، نشیبی علاقے زیرِ آب آگئے

آج اپنے ایک بیان میں وزیر خارجہ بلاول بھٹو زرداری نے کہا کہ فنانشل ایکشن ٹاسک فورس کی طرف سے پاکستان کے دورے کی اجازت دینے کا اعلان خوش آئند پیش رفت ہے۔ہم سائٹ کے دورے اور گرے لسٹ سے نکلنے کے عمل کے کامیاب اختتام کے منتظر ہیں۔

بیان میں وزیرِ خارجہ بلاول بھٹو زرداری نے کہا کہ ایف اے ٹی ایف پر پیش رفت متحدہ قومی کوششوں اور اسٹیک ہولڈرز کے مفادات کی مکمل ہم آہنگی کا نتیجہ ہے۔ انہوں نے فنانشل ایکشن ٹاسک فورس کے نکات پر عملدرآمد کیلئے معاشی ٹیم کی کارکردگی کو بھی سراہا۔

وزیرِ خارجہ بلاول بھٹو زرداری نے کہا کہ پاکستان قومی معیشت کو مضبوط بنانے کیلئے مالیاتی شعبے میں اصلاحات کے مثبت راستے پر گامزن رہنے کیلئے پر عزم ہے۔ امید ہے کہ گرے لسٹ سے نکلنے کی خوشخبری ملکی معیشت پر اعتماد کی بحالی میں کردار ادا کرے گی۔