اربوں کا منصوبہ، سی ٹی ڈی کو عالمی طرز پر اپ گریڈ کیا جارہا ہے۔آئی جی سندھ

کراچی: صوبائی حکومت نے سی ٹی ڈی سندھ کو عالمی طرز پر اپ گریڈ کرنے پر کام شروع کردیا ہے۔ آئی جی سندھ کا کہنا ہے کہ اپ گریڈیشن کیلئے کام فوری شروع کردیا گیا ہے۔

تفصیلات کے مطابق سندھ حکومت نے سی ٹی ڈی سندھ کی اپ گریڈیشن کیلئے 3 ارب روپے کے فنڈز جاری کرنے کی منظوری دے دی۔ آئی جی سندھ غلام نبی میمن کا کہنا ہے کہ سی ٹی ڈی کی اپ گریڈیشن کا پہلا مرحلہ 3 ماہ میں مکمل ہوجائے گا۔

یہ بھی پڑھیں:

وسط ایشیائی ممالک کا سربراہی اجلاس پاکستان میں ہوگا۔وزیر اعظم

پہلے مرحلے میں محکمۂ انسدادِ دہشت گردی (سی ٹی ڈی) کے انفارمیشن ٹیکنالوجی کے شعبے کو محفوظ اور عالمی اداروں کے ہم آہنگ بنایا جائے گا جس میں جدید ترین سافٹ وئیر کی خریداری اور ماہر آئی ٹی انجینئرز کی خدمات حاصل کرنا بھی شامل ہے۔

آئی جی سندھ غلام نبی میمن کا کہنا ہے کہ سی ٹی ڈی افسران کی فول پروف سکیورٹی کے پیشِ نظر بلٹ پروف گاڑیاں خریدی جارہی ہیں۔ سی ٹی ڈی دفاتر کو حتی الامکان طور پر دہشت گردی سے محفوظ بنانے کیلئے انتہائی مؤثر اقدامات اٹھائے جارہے ہیں۔

منصوبے کے تحت ہر عہدے کے افسران و ملازمین کی رہائش گاہوں کو بھی فول پروف سکیورٹی دی جائے گی۔ کراچی سمیت تمام سی ٹی ڈی دفاتر کیلئے مخصوص کمپلیکس بنائے جارہے ہیں۔ آئی جی سندھ کا کہنا ہے کہ سی ٹی ڈی تھانے، دفاتر، ملازمین کی رہائش گاہیں بھی کمپلیکس کے اندر ہوں گی۔ بہت حد تک کام ہوچکا، مزید پیشرفت تیزی سے جاری ہے۔