بھارت میں کورونا کا قہر، بی جے پی کے حامی مودی پر برس پڑے

نئی دہلی:بھارتی حکمران جماعت بھارتیہ جنتا پارٹی اور مودی کے غلط فیصلوں کے باعث بھارت قبرستان میں تبدیل ہونے لگا۔

واضح رہے کہ کمبھ میلے اور انتخابات میں بی جے پی کی جانب سے کورونا ایس او پیز کو ہوا میں اُڑا دیا گیا، جن کا خمیازہ بھارتی عوام اب تک بھگت رہے ہیں۔

بین الاقوامی میڈیا رپورٹ میں کہا گیا ہے کہ نریندرا مودی کی وجہ سے کورونا وائرس کی ہلاکت خیزی میں اضافے نے بھارتیہ جنتا پارٹی کے وفادار کارکنوں اور ہمدردوں کو بھی مودی سے متنفر کردیا ہے۔

مودی کے حامیوں کا کہنا ہے کہ بھارتی وزیر اعظم نے کورونا وبا کے پیش نظر موثر حکمت عملی مرتب نہیں کی جس کے نتیجے میں اب تک تین لاکھ سے زائد بھارتی موت سے ہم کنار ہوچکے ہیں۔

کورونا کے معاملے پرمودی کی بے حسی کی وجہ سے ان کے حامی انہیں آڑے ہاتھوں لے رہے ہیں، ان کا کہنا ہے کہ اب وہ کبھی مودی کو ووٹ نہیں دیں گے۔

گزشتہ ماہ ہی بی جی پے اور راشٹریہ سوایم سیکو سنگھ(آر ایس ایس) کے دیرینہ کارکن امیت جسوال کا اتر پردیش کے ایک چھوٹے سے گاؤں میں دیہانت ہوگیا۔ وہ کورونا مثبت آنے کے بعد محض دس دنوں میں ہی چل بسے۔

ان کے اہل خانہ مودی اور حکم ران جماعت کے عہدے داروں سے مدد کی درخواست کرتے رہے لیکن انہیں کوئی طبی امداد نہیں دی گئی۔امیت جسوال کے دیہانت کے بعد ان کے اہل خانہ نے اپنی کار پر پوسٹر لگوا دیا ہے کہ ’مودی کی بے حسی کو کبھی معاف نہیں کریں گے۔

صرف یہی نہیں بلکہ بی جے پی اور مودی کے کارکنان اور حامی کورونا میں مودی کی پالیسیوں کی وجہ سے ہونے والی جانی نقصان پرغم وغصے کا شکار ہیں۔ اورانہوں نے سرعام مودی اور بھارتیہ جنتا پارٹی کو تنقید کا نشانہ بنانا شروع کردیا ہے۔