گوگل نیوز پر ہمیں فالو کریںاسلام آباد: سینئر سیاستدان، پاکستان پیپلز پارٹی کے رہنما اور سابق وزیرِ دفاع چوہدری احمد مختار انتقال کر گئے ہیں جس پر حکومت نے افسوس کا اظہار کیا ہے۔
تفصیلات کے مطابق سابق وزیرِ اعظم اور پیپلز پارٹی کی چیئرپرسن محترمہ بے نظیر بھٹو شہید کے دور میں احمد مختار پی پی پی کے جنرل سیکریٹری کے طور پر پارٹی کیلئے اہم خدمات سرانجام دیتے رہے۔
سینئر سیاستدان چوہدری احمد مختار کے اہلِ خانہ کا کہنا ہے کہ پی پی پی رہنما کی نمازِ جنازہ آج ڈیڑھ بجے ڈیفنس ٹی بلاک مسجد میں ادا کی جائے گی جس میں معروف سیاسی و سماجی شخصیات بڑی تعداد میں شریک ہوں گی۔
انتقال کے وقت چوہدری احمد مختار کی عمر 74 برس تھی۔ سابق وزیرِ اعظم یوسف رضا گیلانی کے دورِ حکومت میں چوہدری احمد مختارپاکستان کے وزیرِ دفاع رہ چکے ہیں۔ ضلع گجرات سے چوہدری احمد مختار نے حلقہ این اے 105 میں 1993 اور 2008ء میں چوہدری شجاعت حسین کو شکست دی تھی۔
چوہدری احمد مختار کے انتقال پر ملک کی معروف شخصیات نے افسوس کا اظہار کیا ہے۔وفاقی حکومت کی طرف سے وزیرِ سائنس و ٹیکنالوجی فواد چوہدری نے چوہدری احمد مختار کے انتقال پر افسوس کا اظہار کیا۔
سماجی رابطے کی ویب سائٹ ٹوئٹر پر اپنے پیغام میں وزیرِ سائنس و ٹیکنالوجی فواد چوہدری نے کہا کہ مجھے چوہدری احمد مختار کے انتقال پر بے حد افسوس ہوا ہے، میں چوہدری احمد مختار اور مرحوم خالد کھرل کے ساتھ سیاسی بحث و مباحثے میں شریک ہوتا تھا۔
وزیرِ سائنس و ٹیکنالوجی فواد چوہدری نے کہا کہ خالد کھرل اور چوہدری احمد مختار دونوں ہی پیپلز پارٹی کے مرکزی رہنما اور پاکستانی سیاست کے اہم کردار تھے اور دونوں ہی آج نہیں رہے جنہیں ہمیشہ یاد کیا جائے گا۔
Extremely sorry to hear about sad demise of Ch Ahmad Mukhtar,he was not well for quite sometime we used to have debates on coffee with late Khaled Kharral both were centre forwards of PPP and important players of Pak politics both are no more …. will be missed … RIP sir….
— Ch Fawad Hussain (@fawadchaudhry) November 25, 2020
یہ بھی پڑھیں: سابق چیئرمین نیب ایڈمرل ریٹائرڈ فصیح بخاری انتقال کر گئے
