گوگل نیوز پر ہمیں فالو کریںاپنی بے سری اور بھدی آواز سے درد سر پیدا کرنے والے خود ساختہ گلوکار چاہت فتح علی خان نے گائیکی میں بری شہرت میں کامیابی کے جھنڈے گاڑنے کے بعد پاکستان کرکٹ بورڈ کو بڑی پیشکش کردی ہے۔
اپنی ڈیبیو فلم ‘سبق’ کی تشہیر کے لیے لندن میں موجود چاہت فتح نے نجی ٹی وی چینل سے گفتگو کرتے ہوئے ورلڈ کپ میں قومی ٹیم کی ناقص کارکردگی پر اپنے خیالات کا اظہار کیا۔
موقر معاصر ایکسپریس کے مطابق چاہت فتح علی خان نے کہا کہ پاکستان کرکٹ بورڈ کو چیئرمین کے لیے تجربہ کار کرکٹر کی ضرورت ہے، میں چاہتا ہوں کہ مجھے بورڈ کا چیئرمین بنا دیا جائے تو میں ہفتے میں چار دن خود گراؤنڈ میں جاکر کھلاڑیوں کی پرفارمنس اور کوچنگ کا جائزہ لوں گا۔
اُنہوں نے کہا کہ میں قومی ٹیم کے لیے صرف ایک ہی کوچ منتخب کروں گا اور خود جاکر دیکھا کروں گا کہ میرا منتخب کیا گیا کوچ ہماری قومی ٹیم کی کیسی کوچنگ کر رہا ہے۔
چاہت فتح علی خان نے مزید کہا کہ ہمارے کھلاڑیوں کو ذہنی طور پر مضبوط ہونے کی ضرورت ہے، میں قومی ٹیم کو ذہنی اور دلی طور پر مضبوط بناؤں گا۔
چاہت فتح علی خان کا کرکٹ کیریئر
معلوم ہوا ہے کہ چاہت فتح علی خان کا اصل نام کاشف رانا ہے، وہ ماضی میں فرسٹ کلاس کرکٹر بھی رہ چکے ہیں، بتایا جاتا ہے کہ وہ قائد اعظم ٹرافی کے 1983 اور 1984 کے سیزن میں لاہور کی ٹیم کا حصہ تھے۔
چاہت فتح علی خان نے دو فرسٹ کلاس میچ کھیلے، جس میں انہوں نے تین اننگز میں صرف 16 رنز بنائے، بعد ازاں وہ برطانیہ چلے گئے، جہاں انہوں نے 12 سال تک کلب کرکٹ کھیلی۔
