گوگل نیوز پر ہمیں فالو کریںپاکستان مرکزی مسلم لیگ کے وفد نے قطر میں حماس رہنما خالد مشعل سے ملاقات کی اور پاکستانی عوام کی طرف سے اہل غزہ سے اظہار یکجہتی کا پیغام دیا۔
ملاقات کے بعد مشترکہ اعلامیہ میں کہا گیا کہ فلسطین اور بیت المقدس کی آزادی اور اسرائیل کی جارحیت روکنے کے لیے مسلمان حکمران قراردادوں کی بجائے کردار پیش کریں۔
مسلم میڈیکل مشن کے صدر ڈاکٹر ناصر ہمدانی کی قیادت میں وفد نے خالد مشعل سے ملاقات کے دوران طبی سہولیات اور ڈاکٹرز کے حوالے سے اپنی خدمات پیش کیں۔ فلسطینی رہنما نے اس موقع پر کہا کہ ہم پاکستان مرکزی مسلم لیگ کے بے حد مشکور ہیں کہ ان کے توسط سے پاکستانی عوام اہل غزہ کے ساتھ بھرپور اظہار یکجہتی کررہے ہیں۔
ڈاکٹر ناصر ہمدانی نے کہا کہ مرکزی مسلم لیگ فلسطین میں ہونے والے ظلم و ستم اور بالخصوص عورتوں اور بچوں پر ہونے والی وحشیانہ بمباری کی شدید مذمت کرتی ہے۔ ملک بھر میں ہونے والے القدس و یکجہتی فلسطین مارچز میں ہماری مائیں بیٹیاں اعلان کررہی ہیں کہ ہمارے بچے بیت المقدس کی آزادی پر قربان ہیں۔
خالد مشعل نے کہا کہ غزہ کا محاذ مشکل ترین ہے، یہ جنگ امت کی طرف سے مسجد اقصی کی حمایت اور اسریٰ و معراج کی سرزمین کے دفاع میں لڑی جارہی ہے۔ اس جنگ میں صہیونی غاصب ریاست کی جارحیت کے خلاف امت مسلمہ کا کھڑے ہونا ہمارے لیے باعث راحت ہے۔
مرکزی مسلم لیگ کے وفد سے گفتگو کرتے ہوئے فلسطینی رہنما نے اہل پاکستان کے نام خصوصی پیغام دیتے ہوئے کہا کہ ہم آپ سے یہ امید رکھتے ہیں کہ آپ اپنی ذمہ داری سمجھتے ہوئے اپنی کوشش جاری رکھیں گے اور ہمارا ساتھ دیتے رہیں گے، آپ سے درخواست ہے کہ حکومت پاکستان کو ساتھ ملا کر بھرپور عوامی تحریک چلائیں، اہل غزہ کے ساتھ تعاون جاری رکھیں تاکہ اس جارحیت کو روکنے کے لیے صہیونیوں پر دباؤ بڑھایا جاسکے۔
انہوں نے کہا کہ ہمارے دو بڑے اہداف ہیں، غزہ پر جارحیت کو رکوانا اور اہل غزہ کی بحالی۔ اس موقع پر پاکستان مرکزی مسلم لیگ کی جانب سے فلسطینی رہنماؤں کو خصوصی پیغام دیا گیا کہ پاکستان کے عوام فلسطین کے ساتھ ہیں۔ پاکستان کا ہر فرد فلسطین کا درد محسوس کرتا ہے۔
مرکزی مسلم لیگ کے زیر اہتمام ہونے والے یکجہتی فلسطین و القدس مارچز میں مرد و خواتین سمیت ہر شعبہ زندگی کے افراد کی جوق در جوق شرکت فلسطین سے محبت کو ظاہر کرتی ہے۔
