گوگل نیوز پر ہمیں فالو کریںانڈین پریمئر لیگ کے 57ویں میچ میں چنئی سپر کنگز نے کولکتہ نائٹ رائیڈرز کو دو وکٹوں سے شکست دے دی جس کے ساتھ ہی کولکتہ کی پلے آف میں رسائی کی امیدیں تقریباً ختم ہو گئیں۔
کولکتہ نے پہلے بیٹنگ کرتے ہوئے 179 رنز بنائے جس میں اجنکیا رہانے کے 48 اور آندرے رسل کے 38 رنز نمایاں رہے لیکن نور احمد کے شاندار 4 وکٹوں کے اسپیل نے کولکتہ کی رفتار توڑ دی۔
چنئی کی جانب سے دیوالڈ بریوس نے 22 گیندوں پر 52 رنز کی برق رفتار اننگز کھیلی اور ایک اوور میں 30 رنز بناتے ہوئے میچ کا پانسہ پلٹ دیا۔
چنئی کی اننگز میں اتار چڑھاؤ کا سلسلہ جاری رہا۔ ایک موقع پر ٹیم پاور پلے میں ہی 5 وکٹیں گنوا چکی تھی لیکن شیوام دوبے 45 اور مہندر سنگھ دھونی نے سنبھالا دیا۔ آخری اوور میں دھونی نے پہلا شاٹ چھکے کے لیے مارا جبکہ فتح کا آخری اسٹروک انشل کمبوج نے کھیلا۔
اس میچ سے قبل چنئی مسلسل 12 میچ ہار چکی تھی لیکن اس جیت نے اس سلسلے کو توڑ دیا۔ نور احمد کو شاندار باؤلنگ پرفارمنس پر میچ کا بہترین کھلاڑی قرار دیا گیا۔
کولکتہ اب بھی پلے آف کی دوڑ میں باقی ہے لیکن انھیں باقی دونوں میچ جیتنے کے ساتھ دیگر نتائج بھی اپنے حق میں درکار ہوں گے۔
