برمنگھم کامن ویلتھ گیمز، پہلے ہی دن پاکستان کے 6 کھلاڑی باہر

برمنگھم: برطانیہ کے شہر برمنگھم میں جاری کامن ویلتھ گیمز میں پاکستانی اتھلیٹس نے مایوس کن آغاز کیا اور پہلے ہی روز چار سوئمرز، ایک باکسر اور جمناسٹ اچھی کارکردگی نہ دکھانے پر اگلے مرحلے تک رسائی حاصل کرنے میں ناکام رہے۔

تفصیلات کے مطابق پاکستانی اتھلیٹس نے پہلے دن سوئمنگ، باکسنگ اور جمناسٹک کے مقابلوں میں حصہ لیا لیکن ناقص کارکردگی کے باعث اگلے مرحلے تک رسائی حاصل کرنے میں ناکام رہے۔

پاکستانی سوئمر حسیب طارق جو اپنے راؤنڈ میں سرفہرست تھے مگر وہ کوالیفائی نہیں کرسکے، جبکہ سو میٹر بٹر فلائی میں پاکستانی سوئمر بسمہ خان بھی کوئی خاص کارکردگی دکھانے میں ناکام رہیں، بسمہ خان مقابلے میں 38 میں سے 31 نمبر پر مقابلہ ختم کیا۔

یہ بھی پڑھیں:

عمران طاہر اور کولن منرو پاکستان جونیئر لیگ کی ٹیموں کے مینٹورز مقرر

پاکستان کی تیسری سوئمر جہاں آرا نے بھی ساتھ کھلاڑیوں کی تقلید کی اور دو سو میٹر فری اسٹائل میں 30 سوئمرز میں 22 واں نمبر حاصل کیا۔

پاکستان کی ایک اور اتھلیٹ مشال کا بھی 33 اتھلیٹس کے مقابلوں میں 31 واں نمبر رہا، جبکہ باکسنگ میں پاکستانی باکسر سلیمان بلوچ روایتی حریف بھارتی باکسر کے خلاف راؤنڈ آف سکسٹین میں شکست سے دوچار ہوئے۔

پاکستانی اتھلیٹس اور آفیشلز نے کامن ویلتھ گیمز کے شیکلٹن ولیج برمنگھم میں نماز جمعہ بھی ادا کیا، جس میں حافظ محمد عبداللہ نے امامت کے فرائض انجام دیے۔

واضح رہے کہ پاکستان کی خواتین کرکٹ ٹیم کامن ویلتھ گیمز میں اپنی مہم کا آغاز آج بارباڈوس کے خلاف میچ سے کرے گی۔