لانگ مارچ میں توڑ پھوڑ، پی ٹی آئی رہنماؤں کے وارنٹ گرفتاری جاری

لاہور: انسدادِ دہشتگردی کی عدالت نے لانگ مارچ کے دوران توڑپھوڑ کرنے کے الزام پر پی ٹی آئی رہنماؤں کے ناقابلِ ضمانت وارنٹ گرفتاری جاری کردیے۔

تفصیلات کے مطابق انسدادِ دہشتگردی کی عدالت میں لانگ مارچ کے دوران توڑپھوڑ کے الزام پر پی ٹی آئی رہنماؤں کیخلاف کیس کی سماعت ہوئی، جس میں عدالت نے شفقت محمود، حماد اظہر اور یاسمین راشد سمیت پی ٹی آئی کے 12 رہنماؤں کے ناقابلِ ضمانت وارنٹ گرفتاری جاری کردیے۔

سماعت کے دوران پولیس نے پی ٹی آئی کے 12 رہنماؤں کے ناقابل ضمانت وارنٹ گرفتاری جاری کرنے کی استدعا کی جسے عدالت نے منظور کرلیا۔

یہ بھی پڑھیں: مقصود چپڑاسی کی پراسرار موت، پی ٹی آئی نے تحقیقات کا مطالبہ کردیا

عدالت نے تفتیشی افسر کی درخواست پر زبیر خان نیازی، میاں محمود الرشید، شفقت محمود، یاسمین راشد، حماد اظہر، اعجاز چوہدری، میاں اسلم اقبال، مراد راس، یاسر گیلانی، امتیاز محمود شیخ، ندیم عباس اور عندلیب عباس کے ناقابل وارنٹ گرفتاری جاری کردیے۔

واضح رہے کہ پولیس نے لانگ مارچ کے دوران توڑ پھوڑ کے الزام میں پی ٹی آئی رہنماؤں کے خلاف مقدمہ درج کررکھا ہے جس کی سماعت انسداد دہشتگردی کی عدالت میں ہوئی۔

دوسری جانب وارنٹ جاری ہونے کے بعد پی ٹی آئی رہنماؤں نے عبوری ضمانت کے لیے عدالت سے رجوع کرلیا۔