ممبئی: بالی ووڈ اداکارہ عالیہ بھٹ نے پاکستانی سپراسٹار فواد خان کے ساتھ کام کرنے کے تجربے کو انتہائی خوشگوار قرار دے دیا۔

عالیہ بھٹ اپنی آنے والی فلم ’’گنگو بائی کاٹھیا واڑی‘‘ کے پریمیئر کے لیے ان دنوں برلن میں موجود ہیں۔ جہاں 72 ویں انٹرنیشنل برلن فلم فیسٹیول میں ان کی فلم کا ورلڈ پریمیئر دکھایا جائے گا۔

برلن میں ڈی ڈبلیو اردوکو دئیے گئے انٹرویو میں عالیہ بھٹ نے اپنی آنے والی فلم کے حوالے سے کہا کہ انہیں گنگو بائی کی زندگی کی کہانی کافی منفرد لگتی ہے، اسی وجہ سے انہوں نے یہ فلم سائن کی۔ اس کے علاوہ وہ سنجے لیلا بھنسالی جیسے منجھے ہوئے ڈائریکٹر کے ساتھ  بھی کام کرنے کی خواہشمند تھیں۔

‎دوران انٹرویو عالیہ بھٹ نے پاکستانی سپراسٹار فواد خان اور علی ظفر کے ساتھ کام کرنے کے تجربے کو خوشگوار قرار دیتے ہوئے بیان دیا کہ انہوں نے علی ظفر کے مقابلے فواد خان کے ساتھ زیادہ وقت گزارا ہے اور اسی لیے انہیں فواد خان کو جاننے کا زیادہ موقع مل سکا ہے۔

‎علاوہ ازیں عالیہ بھٹ نے کہا کہ فواد خان نے فنکارانہ اور ثقافتی لحاظ سے بطور اداکار سینما میں جیسے اثرات چھوڑے ہیں، ان کے بارے میں بات کرتے ہوئے الفاظ بہت کم پڑجاتے ہیں۔

فواد خان کے ساتھ کام کرنے کا ایک شاندار تجربہ تھا، بطور فنکار میں نے ان سے بہت کچھ سیکھا ہے۔ عالیہ بھٹ نے کہا کہ ان کے نزدیک موسیقی، اداکاری، ثقافت اور فن کی کوئی سرحد موجود نہیں، جو دل کو چھو جاتا ہے بس وہی ہم پسند کرتے ہیں۔

یہ بھی پڑھیں:

گلوکار علی نور پر صحافی عائشہ کے جنسی ہراسانی کے الزامات

‎مزید برآں عالیہ بھٹ نے اپنے پاکستانی مداحوں کے لیے پیغام بھی دیا کہ بالی ووڈ میں اپنے کیریئر کی شروعات سے ہی میں آپ لوگوں کا بھر پور سپورٹ دیکھتی آرہی ہوں۔ میرے والد مہیش بھٹ نے مجھے بتایا تھا کہ پاکستان میں تمہارے بہت سارے چاہنے والے موجود ہیں، انہیں ہمیشہ  پیار و محبت دینا۔ لہذا میں پاکستانیوں سے ملنے والی محبت کی ہمیشہ سے شکرگزار ہوں عالیہ بھٹ نے تمام پاکستانی مداحوں سے گزارش کی کہ وہ ان کی آنے والی فلم ’’گنگعلی و بائی کاٹھیاواڑی‘‘ لازمی دیکھیں جو کہ 25 فروری کو تمام سنیما گھروں میں ریلیز ہورہی ہے۔