گوگل نیوز پر ہمیں فالو کریںکراچی کے علاقے ڈیفنس میں راہگیر کو کتوں نے بھنبھوڑ کر زخمی کردیا جس کے بعد راضی نامے پر دستخط کردئیے گئے، معاہدے کے مطابق معروف کاروباری شخصیت 10 لاکھ روپے دینے کیلئے رضامند ہے۔
تفصیلات کے مطابق کلپرز کے مالک ہمایوں خان نے سگ گزیدگی کا شکار شہری مرزا اختر علی سے راضی نامے کے معاہدے پر دستخط کردئیے جس کے تحت انہوں نے غیر مشروط طور پر متاثرہ شہری سے معافی مانگ لی۔
راضی نامے کے معاہدے میں کہا گیا ہے کہ متاثرہ شہری مرزا اختر علی کو سگ گزیدگی کے باعث زخم آئے۔ ہمایوں خان یا ان کے اہلِ خانہ اپنے گھر میں پالتو جانور کے طور پر کوئی بھی ضرر رساں کتا نہیں پالیں گے۔
مذکورہ معاہدے میں کہا گیا ہے کہ ہمایوں خان اگر کوئی کتا رکھیں گے تو وہ کلفٹن کنٹونمنٹ بورڈ سے منظور شدہ ہوگا اور اسے گھر سے کسی تربیت یافتہ ٹرینر کے بغیر باہر نکلنے نہیں دیا جائے گا۔
معاہدے میں کہا گیا ہے کہ جن 2 کتوں نے متاثرہ شہری مرزا اختر علی کو نقصان پہنچایااورہمایوں خان کے ممکنہ دیگر کتوں کو بھی فوری جانوروں کا علاج کرنے والے ڈاکٹرز کے حوالے کیا جائے گا۔
اس معاہدے کی چوتھی شرط کے مطابق ہمایوں خان جانوروں کی دیکھ بھال سے منسلک تنظیم عائشہ چندریگر فاؤنڈیشن کو 10 لاکھ روپے ڈونیشن کے طور پر دینے کے پابند ہیں۔
خیال رہے کہ اِس سے قبل کراچی کے علاقے ڈیفنس میں معروف کاروباری شخصیت کے پالتو کتوں نے راہگیر کو کاٹ کاٹ کر زخمی کردیا، جسے فوری طبی امداد بھی مہیا نہ کی جاسکی۔
سوشل میڈیا صارفین کا گزشتہ ماہ کہنا تھا کہ پالتو کتوں نے عمر رسیدہ راہگیر کو بھنبھوڑ کر زخمی کردیا تاہم کتوں کے مالکان واقعے کے بعد اپنے پالتو جانوروں کو گھر لے گئے اور اپنا گیٹ بھی بند کردیا۔زخمی راہگیر کی کوئی مدد نہیں کی گئی۔
مزید پڑھیں: کراچی میں کاروباری شخصیت کے پالتو کتوں نے راہگیر کو بھنبھوڑ ڈالا
