ساہیوال، سابق آرمی چیف پرویز مشرف پر قاتلانہ حملے کا سزا یافتہ مجرم زیرِ حراست انتقال کرگیا

ساہیوال جیل میں سابق چیف آف آرمی اسٹاف جنرل (ر) پرویز مشرف پر قاتلانہ حملے کا سزا یافتہ مجرم زیرِ حراست انتقال کر گیا ہے۔

تفصیلات کے مطابق سابق صدر جنرل (ر) پرویز مشرف پر حملے کا سزا یافتہ قیدی کرم دین زیرِ حراست مبینہ طور پر طبی وجوہات کے باعث ہلاک ہوا تاہم مقامی عدالت نے قیدی کرم دین کی ہلاکت پر عدالتی تحقیقات کا حکم دے دیا ہے۔

یہ بھی پڑھیں:

سپریم کورٹ فیصلے سے سیاسی زلزلہ آگیا۔شیخ رشید

جیل حکام کا کہنا ہے کہ ملزم جمعہ کے روز اچانک بے ہوش ہو کر گر پڑا جسے ٹیچنگ ہسپتال منتقل کیا گیا تاہم قیدی کرم دین علاج کے دوران ہی انتقال کرگیا۔ پولیس کا کہنا ہے کہ مجرم کی لاش پوسٹ مارٹم کے بعد لواحقین کے حوالے کردی گئی ہے۔

لواحقین جان کی بازی ہار جانے والے قیدی کرم دین کی میت کو صادق آباد لے گئے۔ جیل حکام کا کہنا ہے کہ 50 سالہ کرم دین گزشتہ 18 سال سے انسدادِ دہشت گردی عدالت کی دی ہوئی عمر قید کی سزا بھگت رہا تھا۔

ڈسٹرکٹ اینڈ سیشن جج ساہیوال کی جانب سے عدالتی تحقیقات کا حکم سامنے آنے کے ساتھ ساتھ جوڈیشل مجسٹریٹ کو انکوائری آفیسر کی ذمہ داریاں بھی سونپ دی گئی ہیں۔ حکام کا کہنا ہے کہ پوسٹ مارٹم رپورٹ سامنے آنے کے بعد ہی حقائق کا علم ہوسکے گا۔