کامیاب لینڈنگ کے بعد اسپیس ایکس کا اسٹار شپ راکٹ دھماکے سے تباہ ہوگیا

لندن:کامیابی سے لینڈ ہونے کے بعد اسپیس ایکس کا اسپیس کرافٹ اچانک دھماکے سے پھٹ کر تباہ ہوگیا۔

تفصیلات کے مطابق اسپیس ایکس کا اسٹار شپ ایس این 10 پروٹوٹائپ اسپیس کرافٹ تھا جس نے امریکی ریاست ٹیکساس سے پرواز شروع کی اور پھر واپس زمین پر آگیا۔

اسٹار شپ کی کامیاب لینڈنگ پر وہاں موجود عملے نے خوشیاں منانا شروع کردی تھیں، مگر تھوڑی دیر بعد ہی وہ دھماکے سے ہزاروں ٹکڑوں میں تبدیل ہوگیا۔

ایسا پہلی بار نہیں ہوا بلکہ ایسا تیسری بار ہوا ہے کہ جب اسپیس ایکس کے اس اسٹار شپ نے کامیاب پرواز بھری مگر لینڈنگ کے دوران یا اس بار اترنے کے بعد تباہ ہوگیا۔

#SN10 reflew a lot quicker than any of us expected ???? that was insane!!!! So…. congrats and also RIP ????‍♂️???? bye bye SN10, congrats on making history!!!! @spacex @elonmusk pic.twitter.com/FkDTa9ISRi

— Everyday Astronaut (@Erdayastronaut) March 3, 2021

کمپنی کے بانی ایلون مسک نے کہا ہے کہ یہ اُن کی ناکامی نہیں، انہوں نے سوشل میڈیا پلیٹ فارم پر ایک ٹوئٹ میں کہا ‘اسٹار شپ 10 سالم حالت میں لینڈ ہوا، اسپیس ایکس ٹیم نے زبردست کام کیا، ایک دن اسٹار شپ کی پروازیں کامیابی سے ہمکنار ہوں گی۔

اسپیس ایکس نے ایس این 1 کی لینڈنگ کے بعد کے لمحات لائیو اسٹریم کیے تھے۔ایلون مسک نے توقع ظاہر کی ہے کہ یہ خلائی جہاز بتدریج انسانوں اور سو ٹن سامان کو مستقبل میں چاند اور مریخ پر پہنچاسکیں گے۔

اسٹار شپ ایس این 10 نے اسپیس ایکس کی دیگر 2 کوششوں کے مابلے میں لینڈنگ میں کافی حد تک کامیابی حاصل کرلی تھی۔اس سے قبل دسمبر میں ایس این 8 لینڈنگ کے دوران دھماکے سے پھٹ گیا تھا جبکہ فروری میں ایس این 9 کو ناکامی کا سامنا ہوا۔

اسٹار شپ راکٹ ایلون مسک کے خلائی سفر کو معمول بنانے کے منصوبوں کا اہم ترین حصہ ہے۔ایلون مسک کا اس حوالے سے کہنا ہے کہ توقع ہے کہ 2023 میں پہلے عام انسان کو چاند پر بھیجنے میں کامیابی ہوسکے گی، جس کے لیے اسٹار شپ کو ہی استعمال کیا جائے گا۔