گوگل نیوز پر ہمیں فالو کریںگھوٹکی سے تعلق رکھنے والی معروف ٹک ٹاکر سمیرا راجپوت کی لاش ان کے گھر سے پراسرار حالت میں برآمد ہوئی جس کے بعد علاقے میں سنسنی پھیل گئی۔
مقتولہ کی لاش کو لوڈر رکشہ کے ذریعے مقامی اسپتال منتقل کیا گیا جہاں ابتدائی طبی معائنے کے بعد لاش کو پوسٹ مارٹم کے لیے روانہ کیا گیا۔
ورثاء اور قریبی رشتہ داروں کا الزام ہے کہ سمیرا کو اُس کے سابق شوہر علی راجپوت نے مبینہ طور پر زہریلی گولیاں دے کر قتل کیا۔
مقتولہ کی بیٹی نے بھی اس الزام کی تصدیق کرتے ہوئے کہا کہ اس کی والدہ کو زبردستی زہر دیا گیا۔ سمیرا راجپوت نے علی سے تین سال قبل طلاق لی تھی تاہم بتایا جا رہا ہے کہ علی مسلسل اسے دوبارہ شادی کے لیے ہراساں کر رہا تھا۔
پولیس کے مطابق واقعے کی اطلاع ملتے ہی ای سیکشن تھانے کی نفری موقع پر پہنچی اور ابتدائی شواہد اکھٹے کیے۔ بعد ازاں سمیرا کی لاش کو پوسٹ مارٹم کے بعد ورثاء کے حوالے کر دیا گیا۔
پولیس نے علی راجپوت اور اس کے ایک رشتہ دار عدنان راجپوت کو قتل کے شبہ میں حراست میں لے لیا ہے اور مزید تفتیش جاری ہے۔
آخری اطلاعات تک واقعے کا مقدمہ درج نہیں کیا جا سکا تھا۔ پولیس کا کہنا ہے کہ قانونی کارروائی مکمل ہونے کے بعد مقدمہ درج کیا جائے گا۔
عوامی حلقوں اور سوشل میڈیا پر اس واقعے پر شدید ردعمل دیکھنے میں آ رہا ہے اور مقتولہ کو انصاف دلانے کے لیے آوازیں بلند ہو رہی ہیں۔
