گوگل نیوز پر ہمیں فالو کریںلیونل میسی کی میجر لیگ سوکر میں مسلسل پانچ میچز میں دو یا دو سے زائد گول کرنے کی تاریخی کارکردگی بدھ کی رات اس وقت اختتام کو پہنچی جب ان کی ٹیم انٹر میامی کو ایف سی سنسناٹی کے خلاف تین صفر کی فیصلہ کن شکست کا سامنا کرنا پڑا۔
سنسناٹی نے پہلے ہاف میں جیرارڈو والینزویلا کے گول سے برتری حاصل کی جبکہ دوسرے ہاف میں ایوانڈر نے دو شاندار گول داغ کر میچ پر مکمل گرفت حاصل کی۔
یہ کامیابی سنسناٹی کو مشرقی کانفرنس میں فیلڈیلفیا یونین سے صرف ایک پوائنٹ پیچھے لے آئی، جس نے اسی رات سی ایف مونٹریال کو دو ایک سے شکست دی۔
یہ شکست انٹر میامی کی پانچ میچز پر مشتمل فتح کی لڑی کو بھی توڑ گئی، جو اس وقت مشرقی کانفرنس میں پانچویں پوزیشن پر ہے۔ انٹر میامی کا ریکارڈ اب 11 فتوحات، 4 شکستیں اور 5 برابر میچز پر مشتمل ہے۔
میسی ایم ایل ایس کی تاریخ کے پہلے کھلاڑی ہیں جنہوں نے لگاتار پانچ میچز میں دو یا دو سے زیادہ گول کیے۔ انہوں نے 17 لیگ میچز میں 16 گول کر کے لیگ میں سرفہرست پوزیشن حاصل کر رکھی تھی۔
ایف سی سنسناٹی ان کے لیے ہمیشہ ایک مشکل حریف ثابت ہوئی ہے۔ میسی نے اب تک سنسناٹی کے خلاف صرف تین میچز کھیلے ہیں، لیکن وہ کسی بھی میچ میں نمایاں کارکردگی نہ دکھا سکے۔
میچ کے ابتدائی 16 منٹ میں سنسناٹی نے چار بار انٹر میامی کے گول پر حملہ کیا جبکہ میامی ایک بھی شاٹ نہ لگا سکی۔ والینزویلا نے بائیں جانب سے باکس میں داخل ہو کر اپنی مہارت سے سنسناٹی کو پہلا گول دلوایا، جو ان کا اس سیزن کا پانچواں گول تھا۔
میسی کی جانب سے پہلا شاٹ پہلے ہاف کے اضافی وقت کے آخری لمحے میں آیا، جو سنسناٹی کے گول کیپر رومن سیلنٹانو کے ہاتھوں میں آسانی سے جا پہنچا۔
دوسرے ہاف کے آغاز کے چند ہی لمحوں بعد، ایوانڈر نے اپنا 14واں گول اس سیزن میں کیا، جو ایم ایل ایس میں ان کا پچاسواں گول بھی تھا، اور سنسناٹی کو دو صفر کی برتری دلا دی۔
اگرچہ سنسناٹی نے گزشتہ ہفتے کولمبس کے خلاف دو گول کی برتری کھو دی تھی اور چار دو سے ہار گئی تھی، لیکن اس بار انہوں نے میسی کی قیادت میں حملہ آور انٹر میامی کو مکمل طور پر روک کر برتری کو برقرار رکھا۔
ایوانڈر نے 3کے مقابلے صفر کی حتمی برتری اس وقت حاصل کی جب لوکا اوریلانو کے زور دار شاٹ کو کیپر نے روکنے کی کوشش کی لیکن گیند دوبارہ ایوانڈر کے قدموں میں آئی جسے انہوں نے باآسانی گول میں تبدیل کر دیا۔
میسی کو 78ویں منٹ میں ایک اور سنہری موقع ملا، مگر ان کا قریبی فاصلے سے کیا گیا شاٹ کیپر سیلنٹانو نے حیرت انگیز ڈائیو کے ساتھ روک لیا۔
38 سالہ میسی لگاتار آٹھ میچز میں 90 یا زائد منٹ کھیل چکے ہیں، جن میں چار کلب ورلڈ کپ کے مقابلے بھی شامل ہیں۔ دلچسپ بات یہ ہے کہ دوسرے ہاف میں ایک موقع پر وہ میچ میں سب سے کم دوڑنے والے کھلاڑی کے طور پر نظر آئے۔
سنسناٹی نے یہ کامیابی اپنے دوسرے بڑے اسکورر کیوین ڈینکی کے بغیر حاصل کی، جو ٹانگ کی انجری کے باعث میچ میں شامل نہ ہو سکے۔
