پاکستان کے ہاتھوں امریکا کے حوالے کیا گیا افغان شہری طالبان کوششوں سے کل واپس پہنچے گا

افغانستان کی طالبان حکومت کی کوششوں سے گوانتا نامو بے کے امریکی حراستی مرکز میں برسوں سے قید دو افغان شہریوں کو رہا کر دیا گیا ہے، جو  کل افغانستان واپس پہنچ جائیں گے۔
افغان وزارت داخلہ کے ترجمان مفتی عبدالمتین قانع کے مطابق گوانتا نامو کے حراستی مرکز سے رہائی پانے والے یہ افراد ملا عبد الظاہر صابر اور عبد الکریم ہیں۔
عبدالمتین قانع کے مطابق صوبہ لوگر کے رہائشی مولوی عبدالظاہر صابر کو امریکی افواج نے 10 مئی 2002 کو گرفتار کیا تھا اور صوبہ خوست کے رہائشی عبدالکریم کو پاکستان نے 14 اگست 2002 کو گرفتار کرکے امریکہ کے حوالے کردیا تھا جس کے بعد انہیں خلیج گوانتا نامو میں قائم امریکی حراستی مرکز منتقل کر دیا گیا تھا۔
افغان وزارت داخلہ کے ترجمان نے اپنے بیان میں مزید بتایا کہ مذکورہ افراد 2017 سے سلطنت عمان میں کڑی سرکاری نگرانی میں مقیم تھے۔
ان کے مطابق اب امارت اسلامیہ کی کوششوں سے یہ دونوں افغان شہری پیر کی صبح اپنے ملک واپس پہنچ جائیں گے۔