ویسٹ انڈین کرکٹ ٹیم دسمبر میں پاکستان کا دورہ کرے گی

لاہور :ویسٹ انڈیز کرکٹ بورڈ نے پاکستان کرکٹ بورڈ کو یقین دلایا ہے کہ ویسٹ انڈین ٹیم دسمبر میں پاکستان کا دورہ کرے گی۔

ذرائع کے مطابق ویسٹ انڈیز کرکٹ بورڈ نے پی سی بی کو اپنے فیصلے سے آگاہ کردیا ہے۔ دورہ پاکستان کے دوران تین ایک روزہ اور زیادہ سے زیادہ ٹی ٹوئنٹی میچز کھیلے جائیں گے۔

ویسٹ انڈیز کا سیکورٹی وفد نومبر میں پاکستان کا دورہ کرے گا تاکہ ملک کی سیکورٹی کی صورتحال کا جائزہ لیا جاسکے جس کے بعد ویسٹ انڈیز کرکٹ ٹیم پاکستان کا دورہ کرے گی۔

مزید پڑھیں:میرے پیاروں نے آگے بڑھنے میں ہمیشہ حوصلہ افزائی کی،ثانیہ مرزا

واضح رہے کہ انگلش کرکٹ بورڈ نے اکتوبر میں شیڈول دورہ منسوخ کرنے پر پاکستان سے معافی مانگتے ہوئے اگلے سال دورہ پاکستان کا اعلان کردیا ہے۔

انگلش کرکٹ بورڈ کے چیف کا کہنا ہے کہ دورہ پاکستان کی منسوخی کا افسوس ہے، اگلے سال پاکستان کا دورہ کرینگے، سیریز میں 3 ٹیسٹ اور 5 ایک روزہ میچ کھیلے جائینگے۔

پاکستان اور انگلینڈ کے درمیان 2 ٹی ٹوئنٹی میچز کی سیریز اگلے ماہ ہونی تھی تاہم انگلینڈ کرکٹ بورڈ نے مینز اینڈ وومینز کرکٹ ٹیموں کا دورہ پاکستان منسوخ کردیا تھا۔

انگلش کرکٹ بورڈ کی جانب سے جاری بیان میں کہا گیا تھاکہ ہمیں اندازہ ہے کہ اس فیصلے کا پاکستان کرکٹ پر اثر ہوگا، پاکستان کرکٹ پر اس کے اثرات پر ہم افسردہ ہیں مگر 2022 کے ٹورز پر نظریں مرکوز ہیں۔