وزیر اعظم کی معاونِ خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ پاک چین اقتصادی راہداری (سی پیک) منصوبے کے حوالے سے امریکی خدشات سے اتفاق نہیں ہے۔
سماجی رابطے کی ویب سائٹ ٹوئٹر پر اپنے پیغام میں معاونِ خصوصی اطلاعات و نشریات فردوس عاشق اعوان نے کہا کہ سی پیک پاکستان کی اوّلین ترجیح ہے۔
معاونِ خصوصی اطلاعات ڈاکٹر فردوس عاشق اعوان نے کہا کہ سی پیک وہ عظیم راہداری ہے جو پاکستان اور چین سمیت پورے خطے کی اقتصادی ترقی اور خوشحالی کی نئی راہیں کھولے گی۔
ڈاکٹر فردوس عاشق اعوان نے کہا کہ پاک چین اقتصادی راہداری (سی پیک) پاکستان کی اقتصادی و معاشی ترقی کا ضامن ہے جبکہ چین ہمارا قریبی دوست ملک ہے جس نے آزمائش کی ہر گھڑی میں ڈٹ کر پاکستان کا ساتھ دیا۔
یہ منصوبہ ہماری اقتصادی ترقی کا ضامن ہے۔چین ہمارا قریبی دوست ہے، آزمائش کی ہر گھڑی میں ہمیشہ ڈٹ کر ساتھ دیا۔
— Dr. Firdous Ashiq Awan (@Dr_FirdousAwan) November 24, 2019
انہوں نے کہا کہ پاک چین دوستی شہد سے میٹھی، ہمالیہ سے بلند اور سمندروں سے گہری ہے جو عالمی برادری کے لیے ایک مثال بن چکی ہے۔ سی پیک کے تحت اقتصادی زونز کے قیام سے عوام کے لیے خوشحالی اور روزگار کے مواقع پیدا ہوں گے۔ چین سے لیے گئے کمرشل قرضے آنے والے دور میں کم ہوتے نظر آئیں گے۔
شہد سے میٹھی، ہمالیہ سے بلند اور سمندروں سے گہری پاک چین دوستی دنیا میں ایک مثال بن چکی ہے۔سی پیک کے تحت اقتصادی زونز کے قیام سے عوام کیلئے خوشحالی اور روزگار کے مواقع پیدا ہوں گے۔چین سے لیے گئے کمرشل قرض میں آنے والے ماہ و سال میں کمی نظر آئے گی۔
— Dr. Firdous Ashiq Awan (@Dr_FirdousAwan) November 24, 2019
یاد رہے کہ اس سے قبل معاونِ خصوصی برائے اطلاعات ڈاکٹر فردوس عاشق اعوان نے کہا کہ تصویریں بتا رہی ہیں نوازشریف کی صحت کو کیا خطرات ہیں، الیکشن کمیشن تحریک انصاف کے خلاف درخواست بھی سنے، جو درخواست پی ٹی آئی نے دوسری جماعتوں کے خلاف دی ہیں وہ بھی سنی جائیں، اپوزیشن کی رہبر کمیٹی رہزن کمیٹی بن چکی ہے۔
میڈیا سے دو روز قبل گفتگو کرتے ہوئے معاون خصوصی اطلاعات فردوس عاشق اعوان نے نوازشریف کا ذکر کرتے ہوئے کہا کہ جو ملک کو نقصان پہنچائے اسے معاف کرنا مشکل ہوتا ہے، لوگوں نے علاج معالجے کے نام پر ائیر ایمبولنس کو بلایا اور چارٹرڈ طیارے میں بیٹھ کرگئےجبکہ تصویریں بتا رہی ہیں کہ میاں صاحب کی صحت کو کیا کیا خطرات لاحق ہیں لہٰذا قوم امید کرتی ہے کہ علاج معالجے کے بعد میاں نواز شریف واپس آئیں۔
مزید پڑھیں: تصویریں بتا رہی ہیں نوازشریف کی صحت کو کیا خطرات ہیں، فردوس عاشق اعوان