لاہور:پاکستان مسلم لیگ (ن) کے صدر شہباز شریف نے کہا ہے کہ حکومت کے پیش کردہ معاشی اعدادوشمار ناقابل اعتبار اور قوم سے صریحاًدھوکہ ہیں،معیشت کی بربادی کے بعد معاشی غلط بیانی قوم کے مستقبل سے کھیلنے کے مترادف ہے۔
انہوں نے کہا کہ عوام کو آگاہ کرنا ضروری ہے کہ کس طرح معاشی تباہی ملک پر مسلط کی جارہی ہے،اولین کوشش ہے کہ عوام دشمن بجٹ کسی قیمت پر منظورنہ ہونے دیا جائے۔
ان خیالات کا اظہار انہوں نے مسلم لیگ (ن) کی اکنامک ایڈوائزری کونسل کے ورچوئل اجلاس کی صدارت کرتے ہوئے کیا۔ اجلاس میں سینیٹر اسحاق ڈار نے بھی شرکت کی، جبکہ دیگر رہنماء بھی شریک ہوئے۔
اجلاس میں ملک کی مجموعی معاشی صورتحال کا تفصیلی جائزہ لیاگیا اورمسلم لیگ (ن) کے زیر اہتمام3 جون کو پری بجٹ سیمینار کے حوالے سے حکمت عملی پر مشاورت کی گئی۔
شہباز شریف نے کہا کہ اکنامک ایڈوائزری کونسل موجودہ حالات میں عوامی مفادات کے تحفظ کے لئے تجاویز پیش کرے،عوام کو آگاہ کرنا ضروری ہے کہ کس طرح معاشی تباہی ملک پر مسلط کی جارہی ہے۔
ہم نے قوم کو سچائی بیان کرنی ہے تاکہ تاریخ میں گواہی رہے اور کل کوئی بہانہ نہ بناسکے،اولین کوشش ہے کہ عوام دشمن بجٹ کسی قیمت پر منظورنہ ہونے دیا جائے،ہم نے آج تک قوم کو جو بھی بتایا ہے وہ سچ ثابت ہوا ہے۔
انہوں نے کہا کہ حکومت کے پیش کردہ معاشی اعدادوشمار ناقابل اعتبار اور قوم سے صریح دھوکہ ہیں:شہبازشریف معیشت کی بربادی کے بعد معاشی غلط بیانی قوم کے مستقبل سے کھیلنے کے مترادف ہے۔
اس موقع پر سابق وزرائے خزانہ نے اجلاس کو ملک کے معاشی حقائق کے بارے میں بریفنگ دی،اجلاس میں بجٹ کے موقع پر عوامی مفادات کے تحفظ کے لئے سفارشات پر بھی غور ہوا۔
گوگل نیوز پر ہمیں فالو کریں
