گوگل نیوز پر ہمیں فالو کریںاسلام آباد کیپیٹل ٹیریٹری (ICT) پولیس نے سوشل میڈیا کے ضابطہ اخلاق کی خلاف ورزی پر دو کانسٹیبلز کو معطل کرتے ہوئے انہیں فوری طور پر ریسکیو 15 رپورٹ کرنے کا حکم دے دیا ہے۔
سرکاری خبر رساں ایجنسی اے پی پی کو ایک افسر نے بتایا کہ ڈولفن اسکواڈ کے کانسٹیبل آفتاب احمد اور ریسکیو 15 کے کانسٹیبل احتشام اسلم نے پولیس وردی میں سوشل میڈیا پر نامناسب مواد پوسٹ کیا، جو محکمے کے طے شدہ اصولوں کے خلاف ہے۔
بتایا گیا ہے کہ ان اہلکاروں کی جانب سے پوسٹ کیا گیا مواد سوشل میڈیا پر وائرل ہوگیا، جس پر ڈپٹی انسپکٹر جنرل (ڈی آئی جی) اسلام آباد پولیس، جواد طارق نے فوری نوٹس لیتے ہوئے سخت کارروائی کی ہدایت دی۔
ڈی آئی جی جواد طارق نے واضح کیا کہ اسلام آباد پولیس ایک پیشہ ور اور نظم و ضبط کی حامل فورس ہے، اور اس کے وقار یا عوامی اعتماد کو نقصان پہنچانے والے کسی بھی عمل کو برداشت نہیں کیا جائے گا۔
پولیس کے مطابق دونوں اہلکاروں کو ملازمت سے عارضی طور پر معطل کر کے ریسکیو 15 آفس میں کلوز کر دیا گیا ہے اور ان کے خلاف محکمانہ تحقیقات کا آغاز بھی کر دیا گیا ہے۔
مزید بتایا گیا کہ تمام پولیس اہلکاروں کو ایک بار پھر سختی سے ہدایت کی گئی ہے کہ وہ محکمانہ پالیسیوں، خاص طور پر سوشل میڈیا کے محتاط استعمال، کو ملحوظِ خاطر رکھیں اور ایسی کسی بھی سرگرمی سے باز رہیں جو پولیس فورس کے وقار کو متاثر کر سکتی ہو۔
