گوگل نیوز پر ہمیں فالو کریںکراچی: سائٹ ایسوسی ایشن آف انڈسٹریکے رہنماؤں زبیرموتی والا اورسلیمان چاؤلہ نے کہا ہے کہ لاک ڈاؤن کو آسان بنانے، فوج کی تعیناتی کے سراج تیلی کے مطالبے کی حمایت کرتے ہیں،تمام صنعتی وتجارتی سرگرمیاں بحال کرنے، ایس اوپیز پر عمل درآمدکے لیے فوج تعینات کی جائے۔
سائٹ ایسوسی ایشن آف انڈسٹری کے سرپرست زبیر موتی والا اور صدر سلیمان چاؤلہ نے بی ایم جی کے رہنما سراج قاسم تیلی کی جانب سے لاک ڈاؤن کو آسان بنانے اور شہر بھر میں فوجی جوانوں کی تعیناتی کے مطالبے کی حمایت کی ہے تاکہ لوگوں کو مجوزہ ایس او پیز پر عمل درآمد کرنے کی ترغیب دی جاسکے اور کورونا وبا سے لوگوں کی زندگیوں کو محفوظ بنایا جاسکے۔
ایک بیان میں انہوں نے کہاکہ ایس او پیز پر لازمی طور پر سختی سے عمل درآمد کرکے لوگوں کی زندگیوں کو خطرے میں ڈالے بغیر طویل عرصے تک کاروبار کو جاری رکھا سکتا ہے۔
انہوں نے کہاکہ 2ماہ سے زائد عرصے لاک ڈاؤن کی وجہ سے معیشت کو پہلے ہی بھاری نقصانات کا سامنا ہے لہٰذا ملک کو معاشی طور پر مکمل تباہی سے بچانے کے لیے فوری طور پر تمام صنعتوں اور تجارتی سرگرمیوں کو بحال کرنا انتہائی ضروری ہے۔
انہوں نے صنعتوں کو چلانے میں درپیش مشکلات کا ذکر کرتے ہوئے کہا کہ اب وقت آگیا ہے کہ دیگر صنعتوں کو بھی اپنی پیداواری سرگرمیاں شروع کرنے کی اجازت دی جائے۔
اس وقت دو بڑے عوامل ہیں جن میں ایک یہ کہ جن صنعتوں کو اجازت دی گئی ہے انہیں اپنی صنعتیں چلانے میں شدید دشواریوں کا سامنا ہے کیونکہ ان کی پیداوار کا انحصار وینڈرز کی جانب سے سپلائی پر ہوتا ہے دوسرا یہ کہ مقامی مارکیٹوں میں سپلائی تقریباً ختم ہوگئی ہے ۔
اس کے علاوہ لاک ڈاؤن کی وجہ سے طویل بندش کے نتیجے میں کئی کاروباری ادارے اپنا سرمایہ خرچ کرچکے ہیں لہٰذا ممکن ہے کہ وہ اب دوبارہ اپنا کام کرنے کے قابل نہ رہیں۔
انہوں نے کورونا کے خطرات اور تیزی سے بڑھتے کیسوں کا حوالہ دیتے ہوئے کہاکہ اس کی وجہ معاشرے کے تقریباً تمام طبقوں کی جانب سے ایس اوپیز پر حقیقی معنوں میں عمل درآمد نہ کرنا ہے اور ہم سمجھتے ہیں کہ اس وقت ایس اوپیز پر عمل درآمد کی تعمیل میں ہی ہماری بقا ہے جس کی ذمہ داری پاک فوج کو سونپی جانی چاہیے جو دنیا بھر میں اپنے نظم وضبط کی وجہ سے مشہور ہے۔
مزید پڑھیں: کاروبارمراکز میں ایس او پیز پر عملدرآمد ہی کورونا سے بچاؤ کا واحد راستہ ہے، صادق محمد
