گوگل نیوز پر ہمیں فالو کریںرائل انٹرنیشنل ائیر ٹیٹو (ریاٹ) 2025 میں شرکت کے لیے پاک فضائیہ کے 4 طیارے برطانیہ میں آر اے ایف فیئر فورڈ پہنچ گئے۔
ریاٹ کی ویب سائٹ کے مطابق ائیر شو میں شامل پاکستانی طیاروں میں پاک فضائیہ کے نمبر 8 اسکواڈرن کے 2 جے ایف 17 تھنڈر طیارے اور نمبر 6 اسکوڈرن کا سی 130 ہرکولیس طیارہ شامل ہیں۔
اس کے علاوہ لاجسٹک سپورٹ کے لیے نمبر 10 اسکوڈرن کا آئی ایل 78 طیارہ بھی برطانیہ پہنچا ہے۔
ریاٹ 2025 کا باقاعدہ آغاز 18 جولائی سے ہوگا تاہم شو کے لیے طیاروں کی آمد آج سے شروع ہوگئی ہے۔
پاک فضائیہ کا سی 130 طیارہ ائیر شو کے لیے پہنچنے والے ابتدائی طیاروں میں شامل تھا۔
طیارے کے اگلے حصے پر شاہین کو پینٹ کیا گیا ہے جبکہ طیارے کی دم پر پاک فضائیہ کے مختلف طیارے اور ڈرونز پینٹ کیے گئے ہیں۔
اسی طرح ائیر شو کے لیے پہنچنے والے ایک جے ایف 17 تھنڈر طیارے پر بھی منفرد مارکنگز پینٹ کی گئی ہیں۔
