محمد رضوان کا سیمی فائنل کھیلنا ایک معجزہ تھا،بھارتی ڈاکٹر

دبئی: ٹی ٹوئنٹی ورلڈ کپ کے دوران علالت کے دوران قومی کرکٹ ٹیم کے اوپنر کا علاج کرنے والے بھارتی ڈاکٹر کا کہنا ہے کہ محمد رضوان کا سیمی فائنل کھیلنا ایک معجزہ تھا۔

آئی سی یو میں محمد رضوان کا علاج کرنے والے بھارتی ڈاکٹرساحر سینالابدین کاکہنا ہے کہ آسٹریلیا کے خلاف آئی سی سی ٹی ٹوئنٹی ورلڈ کپ کے سیمی فائنل سے قبل شدید بیمار وکٹ کیپر بلے باز کی جلد صحت یابی پر حیران ہیں۔

ڈاکٹرساحر سینالابدین کاکہنا ہے کہ محمد رضوا ن کا ڈاکٹرز سے بس یہی اصرار تھا کہ میں ٹیم کے ساتھ رہنا چاہتا ہوں، وہ بس کھیلنے کیلئے بضد تھے ،محمد رضوان کی شدید خواہش تھی کہ وہ اہم ناک آؤٹ میچ میں اپنی قوم کے لیے کھیلے۔ان کا کہنا ہے کہ محمد رضوان بہت مضبوط، پرعزم اور پر اعتماد تھے اور میں ان کی صحت یابی دیکھ کر حیران ہوں۔

مزید پڑھیں:سیمی فائنل ہمیں کس نے ہرایا؟

دوسری جانب قومی ٹیم کے ڈاکٹر نجیب سومرو نے کہا ہے کہ ٹیم کے مورال کو گرنے سے بچانے کیلئے رضوان کی بیماری سے آگاہ نہیں کیا گیا تھا۔سیمی فائنل کے بعد کپتان بابراعظم کے ہمراہ ورچوئل پریس کانفرنس میں ڈاکٹر نجیب نے بتایا کہ محمد رضوان کو 9 نومبر کو سینے میں شدید انفیکشن ہوا جس کے بعد انہیں ہسپتال منتقل کرنا پڑا۔

ڈاکٹر نجیب کے مطابق محمد رضوان نے دو راتیں آئی سی یو میں گزاریں اور ان کی زبردست ریکوری ہوئی، پھر انہیں میچ سے پہلے فٹ قرار دیا گیا۔ انہوںنے کہاکہ ہم رضوان کا بہترین عزم دیکھ سکتے ہیں۔

انہوں نے ملک کے لیے شاندار کارکردگی کا مظاہرہ کیا، ہم دیکھ سکتے ہیں کہ انہوں نے کیسی پرفارمنس دی۔ایک سوال کے جواب میں انہوں نے کہا کہ رضوان کی صحت سے متعلق نہ بتانے کا فیصلہ پوری ٹیم مینجمنٹ کا تھا اور یہ ٹیم کے مورال کے لیے کیا گیا۔