گوگل نیوز پر ہمیں فالو کریںواشنگٹن: امریکی صدر نے یوکرین جنگ روکنے کیلئے چین سے مدد مانگ لی ہے۔ ڈونلڈ ٹرمپ کا کہنا ہے کہ میں نے چین کے صدر سے یوکرین کا مسئلہ حل کرنے میں مدد دینے کا کہا ہے۔
تفصیلات کے مطابق امریکی دارالحکومت میں میڈیا سے گفتگو کے دوران ڈونلڈ ٹرمپ نے کہا کہ اگر روسی صدر ولادی میر پیوٹن یوکرین مسئلے پر مذاکرات کی میز پر نہیں بیٹھتے تو روس پر پابندیاں عائد کیے جانے کا امکان ہے۔ صدر پیوٹن کو یوکرینی مسئلے پر مذاکرات کرنے چاہئیں۔
گفتگو کے دوران امریکی صدر نے کہا کہ اگر پیوٹن مذاکرات پر تیار نہ ہوئے تو ممکن ہے روس پر پابندیاں لگا دوں۔ یورپی یونین کو یوکرین پر زیادہ اخراجات کرنا ہوں گے۔ چینی صدر سے بھی کہتا ہوں کہ یوکرین کا مسئلہ حل کرنے میں مدد دیں۔ سوچ رہے ہیں کہ چین پر یکم فروری سے ٹیکس عائد کیا جائے۔
امریکی صدر ڈونلڈ ٹرمپ نے کہا کہ چین پر 10 فیصد ٹیکس عائد کرنے کا پلان ہے۔ ہم 500 ارب ڈالرز کے اسٹارگیٹ اے آئی پراجیکٹ کو شروع کرنے والے ہیں۔ اوپن اے آئی، سافٹ بینک، اوریکل اے آئی میں 500 ارب ڈالر کی سرمایہ کاری ہوگی، جس سے ایک لاکھ ملازمتیں پیدا ہونے کا امکان ہے۔
صدر ڈونلڈ ٹرمپ نے کہا کہ ایلون مسک کے ٹک ٹاک خریدنے کیلئے تیار ہوں، ٹک ٹاک کے مالکان سے بھی ملاقات کرچکا ہوں، سوچ یہ ہے کہ کسی سے ٹک ٹاک خرید کر نصف شیئر امریکا کو دینے کا کہہ دوں۔ ٹک ٹاک کے 50 فیصد شیئر امریکا کو ملنے چاہئیں۔
