کراچی:رینجرز اور پولیس نے مشترکہ کارروائی کرتے ہوئے انتہائی مطلوب 3 رکنی موٹر سائیکل لفٹنگ گینگ کو گرفتار کرکے چوری کی گئی 10موٹر سائیکلیں اور 10چیسز برآمد کرلی ہیں۔
تفصیلات کے مطابق کراچی میں رینجرز اور پولیس نے لانڈھی اورکورنگی میں مشترکہ کارروائی کی، کارروائی کے دوران انتہائی مطلوب 3رکنی موٹرسائیکل لفٹنگ گینگ گرفتار کرلیاگیا۔
ترجمان رینجرز کے مطابق ملزمان کے قبضے سے چوری کی گئی 10موٹر سائیکلیں اور 10چیسز برآمد ہوئی ہیں، ملزمان مسروقہ موٹر سائیکلوں کے پارٹس نکال دیتے تھے اور نکالے گئے پارٹس دوسری موٹرسائیکلوں میں فٹ کرتے تھے۔
ترجمان نے بتایا کہ ملزمان نے موٹرسائیکل چوری کی درجنوں وارداتوں کا اعتراف کیا اور بتایا کہ موٹرسائیکل چیسز کو ندی نالوں میں پھینک دیا کرتے تھے۔ترجمان رینجرز نے کہا کہ گرفتار ملزمان اور برآمدمسروقہ سامان کو پولیس کے حوالے کر دیا گیا ہے۔
مزید پڑھیں:قصور میں پولیس اہلکار سمیت 11 افراد کی خاتون سے اجتماعی زیادتی، 4ملزمان گرفتار