گوگل نیوز پر ہمیں فالو کریںوزیر اعظم پاکستان عمران خان 12 ربیع الاوّل کو منعقد ہونے والی رحمت اللعالمین ﷺ کانفرنس سےخطاب کریں گے جبکہ سن عیسوی کے مطابق کانفرنس 10 نومبر کو ہوگی۔
ہر سال رسول اکرم ﷺ کی ولادت کی مناسبت سے حکومت کی طرف سے رحمت اللعالمین کانفرنس کا انعقاد کیا جاتا ہے جبکہ رواں سال ہونے والی کانفرنس سے وزیر اعظم عمران خان خطاب کریں گے۔
وزیراعظم عمران خان کانفرنس سے اپنے خطاب میں مسلم امہ کے مسائل، ملکی اور بین الاقوامی امور پر روشنی ڈالیں گے جبکہ اس دوران مدرسہ اصلاحات کے ساتھ ساتھ اسلامی امور پر موجودہ حکومت کے دیگر اقدامات سے بھی آگاہ کریں گے۔
سینیٹر فیصل جاوید نے سماجی رابطے کی ویب سائٹ ٹوئٹر پر اپنے پیغام میں کہا کہ وزیر اعظم 12 ربیع الاوّل کے روز رحمت اللعالمین ﷺ کانفرنس سے خطاب کریں گے جو 10 نومبر کو اتوار کے دن ہوگی۔
Rehmatulil Aalimeen (ﷺ) Conference is being held on #12thRabiUlAwal Sunday the 10th Nov 2019. Prime Minister Imran Khan will address the conference insha'ALLAH #RabiulAwwal https://t.co/jvfDLbxseR
— Faisal Javed Khan (@FaisalJavedKhan) November 1, 2019
اپنے ٹوئٹر پیغام میں سینیٹر فیصل جاوید نے ایک مختصر ویڈیو بھی شیئر کی جس میں رحمت اللعالمین ﷺ کانفرنس کے حوالے سے خوبصورت اینی میشن کا استعمال کیا گیا ہے۔
یاد رہے کہ وزیر اعظم پاکستان عمران خان آج ترقیاتی منصوبوں کے افتتاح کے لیے گلگت کے مختصر دورے پر روانہ ہو گئے ہیں جہاں حکومت کے مختلف ترقیاتی منصوبوں کا افتتاح کیا جائے گا۔
گلگت بلتستان میں وزیر اعظم عمران خان آزادی پریڈ کی تقریب میں بطور مہمانِ خصوصی شریک ہو رہے ہیں جہاں پریڈ کی رنگارنگ تقریبات منعقد ہوں گی اور جوان اپنے کمالِ فن اور پیشہ ورانہ مہارت کا مظاہرہ کریں گے۔
مزید پڑھیں: وزیر اعظم ترقیاتی منصوبوں کے افتتاح کے لیے گلگت کے دورے پر روانہ ہو گئے
