گوگل نیوز پر ہمیں فالو کریںاسلام آباد اور لاہور میں جاری احتجاجی مظاہروں نے قومی ایئرلائن پی آئی اے کے فلائٹ آپریشن کو متاثر کر دیا ہے۔
ایئرلائن انتظامیہ نے مسافروں کے لیے نئی ٹریول ایڈوائزری جاری کرتے ہوئے ہدایت کی ہے کہ سفر سے پہلے پروازوں کی تازہ ترین صورتحال ضرور معلوم کریں تاکہ کسی دشواری سے بچا جا سکے۔
ترجمان پی آئی اے کے مطابق دونوں شہروں میں سڑکوں کی بندش اور ٹریفک جام کے باعث متعدد پروازوں میں تاخیر کا خدشہ ہے۔ احتجاجی سرگرمیوں کی وجہ سے عملے کے کئی ارکان وقت پر ایئرپورٹ نہیں پہنچ پا رہے، جس سے فلائٹ شیڈول متاثر ہو رہا ہے۔
ایئرلائن نے مسافروں کو مشورہ دیا ہے کہ وہ پرواز سے کم از کم چار سے پانچ گھنٹے پہلے ایئرپورٹ کے لیے روانہ ہوں اور کسی بھی تبدیلی یا تاخیر کی اطلاع کے لیے پی آئی اے ہیلپ لائن 111-786-786 پر رابطہ کریں۔
انتظامیہ کے مطابق ایئرپورٹس کے راستوں پر غیر یقینی صورتحال کے باوجود پروازوں کے شیڈول کو برقرار رکھنے کی ہر ممکن کوشش کی جا رہی ہے۔ تاہم، موجودہ حالات کے پیش نظر تاخیر سے انکار نہیں کیا جا سکتا۔
پی آئی اے نے مسافروں سے ممکنہ زحمت پر معذرت کرتے ہوئے کہا ہے کہ صورتحال پر مسلسل نظر رکھی جا رہی ہے، اور حالات بہتر ہوتے ہی فلائٹ آپریشن معمول کے مطابق بحال کر دیا جائے گا۔
ذرائع کے مطابق اسلام آباد اور لاہور ایئرپورٹس پر سیکیورٹی سخت کر دی گئی ہے جبکہ اندرونِ ملک پروازوں کو ترجیحی بنیادوں پر منظم کیا جا رہا ہے تاکہ کسی بڑے تعطل سے بچا جا سکے۔
