گوگل نیوز پر ہمیں فالو کریںاسلام آباد: وزیراعظم عمران خان نے کہا ہے کہ ہمارا سسٹم کرپٹ ہے ٹھیک کرنے میں وقت لگے گا، انہوں نے کہا کہ ہمیں اپنی اخلاقیات کا معیاربلند کرنا ہو گا۔
وزیراعظم نے کامیاب جوان کنونشن 2021ء سے خطاب کرتے ہوئے کہا کہ آج کل ٹیپس پر بات ہو رہی ہے، ٹیپس نکل رہی ہیں ججز کے نام آ رہے ہیں۔
وزیر اعظم عمران خان کا کہنا تھا کہ لاہور میں ہونے والی ایک تقریب کے دوران چیف جسٹس آف پاکستان نے شرکت کی، تقریب میں چیف جسٹس کو مدعو کیا گیا اور خطاب ایک مفرور کرتا ہے، فنکشن میں تقریر وہ کرتا ہے جو ملک سے جھوٹ بول کر بھاگا ہوا ہے۔
انہوں نے کہا کہ ہمیں اپنی اخلاقیات کا معیاربلند کرنا ہو گا، اسی لیے رحمت اللعامین اتھارٹی بنائی تاکہ نبیﷺ کی زندگی سے سیکھا جائے، ہم سب عاشق رسول ہے، نبی کی سیرت کواپنانا ہوگا۔
جب ایک قوم کی اخلاقیات ختم ہوتی ہے تووہ تباہ ہو جاتی ہے۔ جاپان میں اخلاقیات کی وجہ سے دوایٹم بم ملک تباہ نہیں کرسکے۔ مدینہ کی ریاست میں اخلاقیات تھیں، ہمارا سسٹم کرپٹ ہے ٹھیک کرنے میں وقت لگے گا۔
کامیاب جوان پروگرام کے حوالے سے وزیراعظم کا کہنا تھا کہ عثمان ڈار اور ان کی ٹیم کو خراج تحسین پیش کرتا ہوں، عثمان ڈار نے جس جنون کے ساتھ یہ کام کیا اس پر مبارکباد دیتا ہوں، کامیاب جوان پروگرام تمام منصوبوں میں سب سے زیادہ کامیاب ہو گا۔
وزیر اعظم نے کہا کہ 25سال پہلے سیاست میں آیا تو کہا سب سے بڑا مسئلہ کرپشن ہے، کرپشن کرنے والے یہ پیسہ باہر بھیج کر ملک کا دگنا نقصان کرتے ہیں، پاناما میں آف شور کمپنیوں میں پیسہ چھپانے والوں کے نام آئے۔
انہوں نے کہا کہ پاناما میں آیا لندن کے چار مہنگے فلیٹس کی مالکن مریم صفدر ہیں، پاناما لیکس پر عدالت میں کیس چلا اور نواز شریف کو سزا ہوئی۔
یہ عدالتوں کوبتادیں یہ پیسہ کدھرسے آیا، پہلے کہا گیا”مجھے کیوں نکالا“ پھر فوج کو برا بھلا کہا گیا، مجھے بھی برا بھلا کہا گیا، میں توپبلک آفس ہولڈرنہیں تھا لیکن سپریم کورٹ میں اپنا 40 سالہ پرانا ریکارڈ دیا۔
وزیر اعظم نے کہا کہ جب میں سیاست میں آیا تو 14 سال میرا مذاق اڑایا گیا، کہا گیا کہ پارٹی سسٹم میں تیسری پارٹی آ ہی نہیں سکتی، جب تیسری پارٹی آ گئی تو تین سال سے سن رہا ہوں یہ ناکام ہو جائے گی۔
انہوں نے کہا کہ اسٹیڈیم میں 9 سال کی عمر میں ٹیسٹ میچ دیکھنے گیا تھا، اپنی والدہ کو کہا ٹیسٹ کرکٹر بننا چاہتا ہوں، میرے خاندان والوں نے کہا تم ٹیسٹ کرکٹرنہیں بن سکتے، ناممکن ہے۔
وزیر اعظم نے کہا کہ ہر چیز میں لوگوں نے مجھے لوگوں نے کہا ناممکن ہے مگر اللہ نے کامیابی دی، میں آج کہتا ہوں کہ انشاء اللہ پاکستانی قوم ایک عظیم قوم بنے گی۔
اللہ نے انسان کواشرف المخلوقات بنایا، جتنا چیلنجزکے سامنے کھڑے ہونگے اتنا ہی کامیاب ہوتے جائیں گے، کامیاب وہ ہوتا ہے جوبڑی سوچ رکھتا ہے اورہارنہیں مانتا۔
وزیر اعظم نے مہنگائی کے حوالے سے بات کرتے ہوئے کہا کہ دنیا میں لاک ڈاؤن لگا، کاروبار رکا اور سپلائی لائن متاثرہوئی، یہ وقت ہمارے لیے مشکل ہے، دنیا میں کورونا کی وجہ سے برا وقت ہے، ہر چیز مہنگی ہو گئی۔
انہوں نے کہا کہ یہ وقت اس پوری دنیا کا مسئلہ ہے۔ 40 لاکھ خاندانوں کو سود کے بغیر گھر کے لیے قرضے دیئے جائیں گے۔ مجھ سب سے زیادہ فخر یونیورسل ہیلتھ کوریج پر ہے۔ ہر شہری کو ہم ہیلتھ انشورنس دے رہے ہیں۔
وزیر اعظم عمران خان نے کہا کہ عثمان ڈارنے بہت اچھا کام کیا ہم آپ کے ساتھ ہیں۔ نچلے طبقے کے لیے آسانیاں پیدا کریں گے۔ 40 لاکھ گھرانوں کوپانچ لاکھ بغیرسود قرض دیں گے، یہ آئیڈیا عثمان ڈارنے دیا۔
مزید پڑھیں: پی ڈی ایم کے تینوں اجلاس بے نتیجہ رہے، ان کی ٹرین چھوٹ چکی ہے، شیخ رشید
