عید الفطر کے موقع پر ملک میں ایک مرتبہ پھر چاند کو لے کر اختلافات سامنے آگئے

عیدالفطر کے موقع پر پاکستان میں گزشتہ کئی سالوں سے چاند کو لے کر بحث ہوتی رہتی ہے تاہم ملک میں ایک سال کے وقفے کے بعد پھر سے دو عیدیں منائی جا رہی ہیں۔

گزشتہ روز مرکزی رویت ہلال کمیٹی نے باہمی مشاورت کے بعد یہ اعلان کیا کہ پاکستان بھر سے چاند کی کوئی شرعی شہادت موصول نہیں ہوئی لہٰذا عیدالفطر منگل 3 مئی کو ہوگی۔

رویت ہلال کمیٹی کے چیئرمین مولانا عبدالخبیر آزاد نے علماء کے ساتھ پریس کانفرنس میں کہا کہ کمیٹی نے اتفاق رائے سے عید الفطر کا فیصلہ کیا۔

بعدازاں دوسری جانب خیبر پختونخوا حکومت نے رویت ہلال کمیٹی کے فیصلے سے اختلاف کرتے ہوئے صوبے میں سرکاری سطح پر آج بروز پیر عید منانے کا اعلان کیا جبکہ قائم مقام گورنر خیبرپختونخوا مشتاق غنی نے صوبائی حکومت کے فیصلے سے اختلاف کرتے ہوئے آج عید نہ منانے کا اعلان کیا۔

یہ بھی پڑھیں: سعودیہ عرب اور متحدہ عرب امارات سمیت کونسے ممالک میں آج عید منائی جارہی ہے؟

مزید برآں پشاور زونل کمیٹی کے ایک اور ممبرعابد حسین شاکری نے گزشتہ روز کہا کہ زونل ہلال کمیٹی کے فیصلہ سے متفق نہیں، کوئی بھی شہادت ہمارے سامنے عملی طور پر پیش نہیں ہوئی۔

ان کا کہنا تھا کہ کوئی شہادت ہوتی تو خود وفاق سے بات کرکے ان کو مطمئن کرتا ، اس طرح کے فیصلوں سے افراتفری پھیلتی ہے بعدازاں انہوں نے کہا کہ وہ شہادتوں پر مطمئن نہ ہونےپرآج روزہ رکھیں گے۔