اسلام آبا د: نیب نے سابق وزراء غلام مرتضیٰ جتوئی ،خدا بخش راجر ، بابر غوری سمیت دیگر کے خلاف16انکوائریز اور محمد رمضان سہیتو و دیگر کے خلاف بدعنوانی کے ریفرنس کی منظوری دیدی ۔
قومی احتساب بیورو کے ایگزیکٹو بورڈ کا اجلاس قومی احتساب بیورو کے چیئرمین جسٹس (ر)جاوید اقبال کی زیرصدارت نیب ہیڈکوارٹر ز اسلام آبادمیں منعقد ہوا۔اجلاس میں حسین اصغر، ڈپٹی چیئرمین نیب،سید اصغر حیدر،پراسیکوٹر جنرل اکاؤنٹبلیٹی، نیب،ظاہر شاہ،ڈی جی آپریشنز، نیب اور دیگر سینئر افسران نے اجلاس میں شرکت کی۔
قومی احتساب بیورو کے ایگزیکٹو بورڈکے اجلاس میں محمد رمضان سہیتو اور دیگر کے خلاف بدعنوانی کے ریفرنس کی منظوری دی گئی۔ملزمان پر مبینہ طورپر اختیارات کا ناجائز استعمال کرتے ہوئے ایجوکیشن اینڈ لٹریسی ڈیپارٹمنٹ نوشہرو فیروز سندھ میں 95غیرقانونی بھرتیاں کرنے کا الزام ہے جس سے قومی خزانے کو تقریبا16کروڑ روپے کا نقصان پہنچا۔ قومی احتساب بیورو کے ایگزیکٹو بورڈکے اجلاس میں 16 انکوائریز کی منظوری دی گئی۔
مزید پڑھیں: ائیرپورٹس اور موٹر ویز گروی رکھنے کی منظوری، کیا ماضی میں بھی کوئی اثاثہ رہن رکھا گیا ؟