گوگل نیوز پر ہمیں فالو کریںامریکی گلوکارہ مائلی سائرس نے 2009 کے ٹین چوائس ایوارڈز میں اپنے متنازع پول ڈانس کے پیچھے موجود شخصیت کے بارے میں اہم انکشاف کیا ہے، یہ اعتراف انہوں نے اپنی بہن برانڈی سائرس کے ساتھ اسپاٹیفائی کے بلین کلب سیریز میں ایک گفتگو کے دوران کیا۔
مائلی نے اس لمحے کو یاد کرتے ہوئے برانڈی سے سوال کیا، “کیا تمہیں معلوم ہے یہ کس کا آئیڈیا تھا؟” برانڈی نے درست جواب دیتے ہوئے ان کی والدہ، ٹش سائرس، کا نام لیا۔ اس پر مائلی نے تصدیق کرتے ہوئے کہا، “جی ہاں، یہ میری ماں کا آئیڈیا تھا، لیکن وہ ہمیشہ مجھے الزام لینے دیتی ہیں۔”
مائلی نے مزید کہا، “جب اگلے دن مجھے تنقید کا سامنا کرنا پڑا، تو تمہیں پتہ ہے کون غائب تھا؟ ٹش سائرس۔” انہوں نے اپنے اسٹیج پرفارمنس کے حوالے سے ایک دلچسپ بات بھی بتائی کہ وہ پہلی بار اسٹیج پر اصلی ہیرے کے زیورات پہنے نظر آئیں۔
مائلی نے اپنے گانے پارٹی ان دی یو ایس اے کے دوران آئس کریم ٹرک پر نصب پول کے ساتھ ڈانس کیا تھا، جو اس وقت کے تنازع کا سبب بنا۔ اس وقت مائلی کی عمر صرف 16 سال تھی، جس کی وجہ سے انہیں سخت تنقید کا سامنا کرنا پڑا۔
جیو نیوز کی رپورٹ کے مطابق، مائلی نے اس متنازع لمحے کو اپنی یادوں میں طنز و مزاح کے ساتھ تازہ کیا اور یہ ظاہر کیا کہ کس طرح ان کی والدہ نے ان کے کیریئر کے ابتدائی دور میں اہم کردار ادا کیا۔
