صحت کارڈ، پناہ گاہ اور احساس پروگرام بند کرنے کی خبریں جھوٹی ہیں۔ مریم اورنگزیب

اسلام آباد: پاکستان مسلم لیگ (ن) کی ترجمان مریم اورنگزیب نے کہا ہے کہ صحت کارڈ، پناہ گاہ اور احساس پروگرام بند کرنے کی خبریں جھوٹی اور بے بنیاد ہیں۔

تفصیلات کے مطابق عمران خان کے احساس پروگرام سے متعلق خبریں مسترد کرتے ہوئے ترجمان ن لیگ مریم اورنگزیب نے کہا کہ وزیر اعظم شہباز شریف واضح طور پر کہہ چکے ہیں کہ سابق حکومت کے عوامی فلاح و بہبود کے منصوبے جاری رکھے جائیں گے۔

یہ بھی پڑھیں:

عمران خان کے خلاف غیر ملکی سازش کی کوئی حقیقت نہیں۔ ملیحہ لودھی

ترجمان مسلم لیگ (ن) مریم اورنگزیب نے کہا کہ بے نظیر انکم سپورٹ پروگرام اسی طرح جاری رہے گا بلکہ اس میں توسیع لائی جائے گی۔ وزیر اعظم شہباز شریف نے بے نظیر پروگرام کے ذریعے لوگوں کو تعلیم دینے کا بھی اعلان کیا ہے۔

ن لیگ کی ترجمان نے کہا کہ صحت کارڈ پروگرام بھی جاری رہے گا بلکہ ہم اس میں بہتری لائیں گے۔ تمام ایسے پروگرام جنہیں عوامی فلاح وبہبود کیلئے شروع کیا گیا، ان کو بہتر بنایا جائے گا۔ سابق عمران خان حکومت کے ممبران بے بنیاد پروپیگنڈا کر رہے ہیں۔

خیال رہے کہ اس سے قبل سابق وزیر اعلیٰ پنجاب سردار عثمان بزدار نے اپنے ٹوئٹر پیغام میں کہا کہ بے حس اور کرپٹ ٹولے نے حکومت حاصل کرتے ہی بے سہارا اور غریب لوگوں کیلئے جاری پناہ گاہیں اور لنگر خانے بند کرنے کا فیصلہ کیا۔

بے حس اور کرپٹ ٹولے نے حکومت حاصل کرتے ہی بےسہارا اور نادار لوگوں کے لیے جاری پناہ گاہیں اور لنگر خانے بند کرنے کا فیصلہ کیا

جیسےپاکستانی قوم کو #امپورٹڈ_حکومت_نامنظور ہے ویسےہی پناہ گاہیں بند کرنےکا فیصلہ بھی نامنظور ہے

پنجاب میں کوئی پناہ گاہ یا لنگر خانہ بند نہیں کیا جائےگا

— Usman Buzdar (@UsmanAKBuzdar) April 15, 2022

پاکستان تحریکِ انصاف کے مرکزی رہنما سردار عثمان بزدار نے کہا کہ جیسے پاکستانی قوم کو امپورٹڈ حکومت نامنظور ہے، ویسے ہی پناہ گاہیں بند کرنے کا فیصلہ بھی نامنظور ہے۔ پنجاب میں کوئی پناہ گاہ یا لنگر خانہ بند نہیں کیا جائے گا۔