گوگل نیوز پر ہمیں فالو کریںکراچی میں محکمہ موسمیات کی جانب سے جاری کردہ تازہ ترین ایڈوائزری کے مطابق شہر کے مضافاتی علاقوں میں آج آندھی اور گرج چمک کے ساتھ بارش کا امکان ہے جبکہ بلوچستان کے مختلف اضلاع میں ژالہ باری، بارش اور تیز ہواؤں کی پیش گوئی کی گئی ہے۔
محکمہ موسمیات کے مطابق کراچی میں آئندہ 24 گھنٹوں کے دوران موسم گرم اور مرطوب رہنے کا امکان ہے اور زیادہ سے زیادہ درجہ حرارت 35 سے 37 ڈگری سینٹی گریڈ کے درمیان رہنے کی توقع ہے۔
گزشتہ روز کراچی کا کم سے کم درجہ حرارت 28 ڈگری سینٹی گریڈ ریکارڈ کیا گیا اور فضاء میں نمی کا تناسب 72 فیصد تھا۔
محکمہ موسمیات نے بتایا کہ شہر کے مرکزی علاقوں میں موسم خشک رہنے کا امکان ہے لیکن مضافاتی علاقوں میں آندھی اور گرج چمک کے ساتھ بارش ہو سکتی ہے۔
بلوچستان میں بھی موسمی شدت میں اضافہ متوقع ہے، خصوصاً قلات، سبی، بارکھان، کوہلو، قلعہ سیف اللہ، قلعہ عبداللہ، نوشکی اور موسیٰ خیل میں تیز ہواؤں، گرج چمک اور ژالہ باری کے امکانات ہیں۔
دیگر اضلاع جیسے کوئٹہ، چمن، زیارت، ہرنائی، ژوب، خضدار، خاران، لسبیلہ، پنجگور اور چاغی میں بھی موسمی تغیرات متوقع ہیں۔
بلوچستان کے مختلف اضلاع میں گزشتہ روز سبی اور نوکنڈی میں 43 ڈگری سینٹی گریڈ، تربت میں 41 ڈگری سینٹی گریڈ، کوئٹہ اور گوادر میں 34 ڈگری سینٹی گریڈ تک درجہ حرارت ریکارڈ کیا گیا۔
حکام نے عوام کو احتیاط برتنے اور موسمی تبدیلیوں کے بارے میں محکمہ موسمیات کی اپ ڈیٹس پر نظر رکھنے کی ہدایت کی ہے۔
