کراچی، چپ تعزیہ کا جلوس، ٹریفک پلان جاری
کراچی میں چپ تعزیہ کے جلوس کے باعث ٹریفک پولیس نے ٹریفک پلان جاری کردیا ہے، جبکہ گرین اور اورنج لائن بس سروسز کل معطل رہیں گی۔
ذرائع کے مطابق کراچی میں چپ تعزیہ کے جلوس کے موقع پر گرین اور اورنج لائن بس سروس پیر 25 ستمبر کومعطل رکھنے کا فیصلہ کیا گیا ہے۔
ایم اے جناح روڈ، نمائش چورنگی اور نشتر پارک کے راستے بند ہونے کے باعث گرین بس سروس کو معطل رکھنے کا فیصلہ کیا گیا ہے۔دوسری جانب نشتر پارک سے چپ تعزیے کے جلوس کے موقع پر ٹریفک پولیس نے ٹریفک پلان جاری کردیا۔
چپ تعزیے کا جلوس نشترپارک سے صبح ساڑھے چھ بجے برآمد کیا جائے گا۔
ٹریفک کوسولجربازار، کوسٹ گارڈ سے ایمپریس مارکیٹ کی جانب جانے کی اجازت نہیں ہوگی، ٹریفک کو جوبلی یا نشترروڈ کی جانب موڑ دیا جائے گا جبکہ ناظم آباد سے آنے والے ٹریفک کو لسبیلہ سے نشترروڈکی جانب جانیکی اجازت ملے گی۔
ٹریفک پولیس کے روٹ پلان کے مطابق لیاقت آباد سے ایم اے جناح روڈ آنے والے ٹریفک کو تین ہٹی سے جیل چورنگی بھیجا جائیگا، اسٹیڈیم روڈ سے ایم اے جناح روڈ کی جانب آنے والا ٹریفک کشمیرروڈ اور سوسائٹی سگنل سے شاہراہ قائدین جاسکتی ہے۔
چھوٹی بڑی کوئی بھی گاڑی کو گرومندر سے نمائش کی جانب جانیکی اجازت نہیں ہوگی، جلوس مقررہ راستوں سے ہوتا ہوا کھارادر میں حسینیہ ایرانیہ امام بارہ پہنچے گا، جلوس نشترپارک، شاہ خراسان روڈ، ایم اے جناح روڈ اور پریڈی اسٹریٹ تبت چوک سے گزرے گا۔
مزید پڑھیں:منہاج القرآن سیکرٹریٹ میں 12 روزہ ضیافتِ میلاد جاری، بڑی تعداد میں لوگ شریک
نیشنل ہائی وے سے آنے والا ٹریفک راشد منہاس روڈ، لیاقت آباد سے سائٹ ایریا شیرشاہ ماڑی کی جانب جاسکے گا۔نشتر پارک، نمائش چورنگی اور ایم اے جناح روڈ پر چپ تعزیہ کے جلوس کی مناسبت سے سکیورٹی کے سخت اقدامات کیے گئے ہیں۔
