عمران خان جتھے لیکر عدالتوں پر حملہ آور ہوئے،مریم نواز
لاہور: چیف آرگنائزر و سینئر نائب صدر مسلم لیگ (ن) مریم نواز نے کہا ہے کہ عمران خان جتھے لیکر عدالتوں پر حملہ آور ہوئے،پی ٹی آئی کی پوری سیاست سہولت کاروں کے گرد گھومتی ہے۔
مریم نواز کا لاہور میں لائرز ونگ کے عہدیداران سے خطاب میں کہنا تھا کہ نواز شریف کیساتھ زیادتیاں کی گئیں، نواز شریف کے بیانیے کو آگے بڑھانے میں آپ کا کردار واضح ہے، قیادت کی سطح پر آپ کو وہ توجہ نہیں ملی جو آپ کا حق تھا۔میری والدہ کے الیکشن میں آپ سب نے ساتھ دیا، بہت جذبے کیساتھ آپ لوگوں نے مشکل وقت میں ساتھ دیا۔
ملک میں انصاف کے ترازو کے پلڑے برابر نہیں، ن لیگ کی قیادت نے جھوٹے مقدمات کا سامنا کیا، زمان پارک میں پولیس پر حملہ کیا گیا پٹرول بم پھینکے گئے۔
مریم نواز کا کہنا تھا کہ کون ہے جو آج بھی عمران خان کو بچا رہا ہے، عمران خان کی ساری سیاست اسٹیبلشمنٹ کے گرد گھومتی ہے، عمران خان کا دامن داغدار نہیں تو عدالتوں کے سامنے پیش ہوں، انتخابات ہی ملکی مسائل کا حل ہیں، ہر پانچ سال بعد الیکشن ہونے چاہئیں، ہم الیکشن سے فرار نہیں چاہتے ہم الیکشن کے لیے تیار ہیں۔
مزید پڑھیں:طاقت کے نشے میں چور حکمران عمران خان کو نہیں سمجھ سکتے۔اشوک سوائن
مریم نواز کا مزید کہنا تھا الیکشن کے علاوہ مسائل کا کوئی حل نہیں، ہر 5 سال بعد انتخابات ہونے چاہئیں۔عمران خان نے آئین و قانون کی دھجیاں اڑائیں، پاکستان کا قانون کہاں سو رہا ہے؟
