گوگل نیوز پر ہمیں فالو کریںلاہور: پاکستان تحریک انصاف (پی ٹی آئی) کے چیئرمین عمران خان نے محسن نقوی کی پنجاب کے نگراں وزیراعلیٰ کے طور پر تقرری کے خلاف سڑکوں پر آنے کا اعلان کرتے ہوئے اس عزم کا اظہار کیا کہ وہ اس عہدے کے لئے ”کرپٹ“ شخص کو قبول نہیں کریں گے۔
ایک ٹیلیویژن خطاب میں، سابق وزیر اعظم عمران خان نے کہا کہ پی ٹی آئی محسن نقوی کی تقرری کے خلاف کل (منگل کو) لاہور اور راولپنڈی میں احتجاج کرے گی۔
عمران خان نے اپنے تحفظات کا اظہار کرتے ہوئے کہا کہ ”جب میں اقتدار میں تھا، مجھے ایک ایسے شخص کے بارے میں رپورٹ موصول ہوئی جس نے تحریک انصاف کی حکومت گرانے کی سب سے زیادہ کوشش کی۔ ان کا نام محسن نقوی تھا۔ انٹیلی جنس بیورو نے بھی ان کی سرگرمیوں کے بارے میں ایک رپورٹ دی تھی،”۔
انہوں نے مزید کہا کہ محسن نقوی ان تمام لوگوں کو سامنے لائیں گے جو ہمارے سخت مخالف ہیں۔
عمران خان نے کہا کہ جس آدمی کو زرداری اپنا بیٹا مانتے ہیں اس کی کیا ساکھ ہو گی؟ نقوی کے پاس نہ تو اخلاقی معیارات ہیں اور نہ ہی غیر جانبداری،“۔
معزول وزیراعظم نے افسوس کا اظہار کیا کہ الیکشن کمیشن آف پاکستان کے تمام فیصلے پی ٹی آئی کے خلاف آئے۔ عمران خان کا خیال تھا کہ نگران وزیراعلیٰ پنجاب کے لیے ان کی پارٹی نے جن ناموں کو حتمی شکل دی ہے وہ پاکستان ڈیموکریٹک موومنٹ (PDM) قبول کرے گی۔
توشہ خانہ ریفرنس کے بارے میں بات کرتے ہوئے انہوں نے اپنے خلاف مقدمے کو ’مذاق‘ قرار دیا۔
عمران خان نے کہا کہ یہ لوگ پی ٹی آئی کی مقبولیت سے خوفزدہ ہیں۔ انہوں نے کہا کہ پی ڈی ایم کی قیادت والی حکومت انتخابات میں تاخیر چاہتی ہے، انہوں نے مزید کہا کہ یہ لوگ الیکشن کمیشن میں اپنے امپائر چاہتے ہیں۔
مزید پڑھیں:استعفے واپس لینے کا مقصد جعلی اپوزیشن لیڈر سے جان چھڑانا ہے۔فواد چوہدری
پی ٹی آئی کے سربراہ نے پارٹی کے مشاورتی اجلاس کی صدارت کرتے ہوئے کہا کہ الیکشن کمیشن کے پنجاب آفس کے باہر احتجاج کرنے کا فیصلہ کیا گیا ہے۔ نگراں وزیراعلیٰ کی تقرری کو چیلنج کرنے کے لیے عدالت میں درخواست بھی دائر کی جائے گی۔
