عفت عمر کا اپنے خرچے پر 10مستحق افراد کو کورونا ویکسین لگوانے فیصلہ

کراچی:پاکستان کی معروف سینئر اداکارہ و میزبان عفت عمر نے فیصلہ کیا ہے کہ وہ اپنے ذاتی خرچ سے 10 مستحق افراد کو عالمی وبا کورونا وائرس سے بچاؤ کی ویکسین لگوائیں گی۔

واضح رہے کہ سینئر اداکارہ عفت عمر نے گزشتہ ماہ کے آخر میں کورونا ویکسین لگوائی تھی جس سے متعلق اُن کی متعدد تصویریں اور ویڈیوز سوشل میڈیا پلیٹ فارمز پر خوب وائرل ہوئی تھیں۔جس پر ان کے چاہنے والوں کی جانب سے ملے جلے رد عمل کا اظہار کیا گیا تھا۔

I am sorry.I am ashamed.I apologise from the bottom of my heart.I will repent.

— Iffat Omar Official (@OmarIffat) April 6, 2021

جبکہ ویڈیو سوشل میڈیا پر اپ ڈیٹ ہونے کے بعد بعض صارفین نے عفت عمر کو آڑے ہاتھوں بھی لیا اور کہا کہ وہ یوں تو حکومت پر بہت تنقید کرتی ہیں مگر خود انہوں نے مفت کی ویکسین لگوا کر بزرگوں اور غریبوں کا حق مارا ہے۔

سوشل میڈیا صارفین کی جانب سے تنقید میں کہنا تھا کہ ’عفت عمر نا تو 60 سالہ بزرگ ہیں اور نا ہی پیرا میڈیکل اسٹا ف، انہوں نے مفت ویکسین کیسے لگوالی۔‘جس پر عفت عمر نے ٹوئٹ کیا انہوں نے سوشل میڈیا صارفین سے معافی مانگی۔

عفت عمر کے معافی مانگنے کے بعد ایک ٹوئٹر کے صارف نے انہیں ٹوئٹ کرتے ہوئے مشورہ دیا کہ کتنا اچھا ہوگا کہ سینئر اداکارہ عفت عمر اپنے خرچے سے پرائیویٹ ویکسین خرید کر مستحق افراد کو لگوا دیں۔‘جواب دیتے ہوئے عفت عمر نے کہا کہ وہ 10 افراد کو اپنے خرچے پر ویکسین لگوائیں گی۔