ہرارے: دوسرا ٹیسٹ میچ، پاکستان نے 4وکٹوں کے نقصان پر 268رنز بنا لیے

موسم

قیمتیں

ٹرانسپورٹ

ہرارے: پاکستان اور زمبابوے کے درمیان کھیلی جارہی 2 ٹیسٹ میچوں کی سیریز کے دوسرے میچ میں قومی ٹیم کی ٹاس جیت کر بیٹنگ جاری ہے۔ پہلے دن کے اختتام پر قومی ٹیم نے 4 وکٹ کے نقصان پر 268 رنز بنالیے ہیں۔ عابد علی 118 اور ساجد خان ایک رنز کے ساتھ ناٹ آؤٹ ہیں۔

دوسرے ٹیسٹ میں قومی کرکٹ ٹیم کے کپتان بابر اعظم نے ٹاس جیت کر زمبابوے کے خلاف پہلے بیٹنگ کا فیصلہ کیا جو سودمند ثابت ہوا۔ پاکستان کی جانب سے اننگز کا آغاز عمران بٹ اور عابد علی نے کیا، تاہم عمران بٹ صرف 2 رنز ہی بنا پائے تھے کہ آؤٹ ہوکر پویلین لوٹ گئے۔

جس کے بعد عابد علی نے اظہر علی کے ساتھ ملکر 236 رنز کی شراکت قائم کی۔ اس دوران دونوں بلے بازوں نے اپنی سنچریاں مکمل کیں۔اظہر علی 126 رنز کی اننگز کھیلنے کے بعد مزاربانی کا شکار بنے جب کہ پہلے میچ میں صفر پر آؤٹ ہونے والے بابراعظم اس اننگز میں بھی صرف 2 رنز ہی بناسکے۔ پچھلے میچ کے سنچری میکر فواد عالم کی اننگز بھی 5 رنز تک محدود رہی۔

زمبابوے کے خلاف دوسرے ٹیسٹ میچ کے لیے قومی ٹیم میں ایک تبدیلی کی گئی ہے، فہیم اشرف کی جگہ تابش خان کو شامل کیا گیا ہے جب کہ 36 سالہ فاسٹ بولر تابش خان پہلا ٹیسٹ کھیلیں گے۔

قومی ٹیم کے کپتان بابراعظم کا کہنا ہے کہ پہلے بیٹنگ کرتے ہوئے بڑا اسکور کرنے کی کوشش کریں گے جب کہ کپتان زمبابوے برینڈن ٹیلر کا کہنا ہے کہ ٹاس جیت جاتے تو ہم بھی بیٹنگ کا ہی فیصلہ کرتے۔

واضح رہے کہ 2 ٹیسٹ میچوں کی سیریز میں قومی ٹیم کو 0-1 کی برتری حاصل ہے، پاکستان نے پہلے ٹیسٹ میں زمبابوے کو ایک اننگز 116 رنز سے شکست دی تھی۔