گوگل نیوز پر ہمیں فالو کریںاسلام آباد: وزیر اعظم کی معاونِ خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیر خارجہ شاہ محمود قریشی کا ایران اور سعودی عرب کا دورہ پاکستان کی مخلصانہ سفارتی کاوشوں کا ثبوت ہے۔
سماجی رابطے کی ویب سائٹ ٹوئٹر پر اپنے پیغام میں معاونِ خصوصی اطلاعات فردوس عاشق اعوان نے کہا کہ وزیر خارجہ کا دورہ اختلافات کے پر امن ذرائع سے حل اور امن و استحکام کو تقویت دے گا۔
وزیر خارجہ شاہ محمود قریشی کا ایران اور سعودی عرب کا دورہ اختلافات کے پرامن ذرائع سے حل اور کشیدگی میں کمی کیلئے سفارتی محاذ پر پاکستان کی مخلصانہ کاوشوں کا واضح ثبوت ہے۔یہ دورہ علاقائی امن و استحکام کو تقویت دے گا۔
— Dr. Firdous Ashiq Awan (@Dr_FirdousAwan) January 12, 2020
ٹوئٹر پیغام میں معاونِ خصوصی فردوس عاشق اعوان نے کہا کہ ایرانی ہم منصب جواد ظریف اور سعودی وزیر خارجہ شہزادہ فیصل بن فرحان آلِ سعود سے ملاقات میں خلیجی خطے کی تازہ تری صورتحال پر تبادلۂ خیال ہوگا۔
معاونِ خصوصی فردوس عاشق اعوان نے وزیر خارجہ شاہ محمود قریشی کے دورے پر تبصرہ کرتے ہوئے کہا کہ وزیر خارجہ اس دوران تنازعات کے خاتمے کی اہمیت پر زور دیں گے۔
ایرانی ہم منصب جواد ظریف اور سعودی وزیر خارجہ شہزادہ فیصل بن فرحان آل سعود سے ملاقات میں خلیجی خطے کی تازہ ترین صورتحال پرتبادلہ خیال ہوگا۔ وزیر خارجہ تنازعات کے خاتمے کی اہمیت پر زور دیں گے۔
— Dr. Firdous Ashiq Awan (@Dr_FirdousAwan) January 12, 2020
ڈاکٹر فردوس عاشق اعوان نے کہا کہ امتِ مسلمہ اور خطے میں امن کے لیے متحرک کردار ادا کرنا پاکستان کے لیے باعثِ اعزاز ہے جس کی اسلامی ممالک اور مغربی دنیا تعریف کر رہی ہے۔
فردوس عاشق اعوان نے کہا کہ وزیر اعظم عمران خان کی قیادت میں نئے پاکستان کا یہ روشن کردار ہے اور اس کے عالمی تشخص کو بدل رہا ہے۔
امت مسلمہ اور خطے میں امن کے مفاد کیلئے متحرک کردار ادا کرنا پاکستان کے لیے باعث اعزاز ہے جس کی اسلامی ممالک اور مغربی دنیا تحسین کر رہی ہے۔ وزیراعظم عمران خان کی قیادت میں نئے پاکستان کا یہ روشن کردار ہے اور اس کے عالمی تشخص کو بدل رہا ہے۔
— Dr. Firdous Ashiq Awan (@Dr_FirdousAwan) January 12, 2020
یاد رہے کہ اس سے قبل وزیر خارجہ شاہ محمود قریشی ہمسایہ اسلامی ملک ایران کے ایک روزہ سرکاری دورے پر روانہ ہو گئے ہیں جس کے بعد وہ سعودی عرب کا دورہ کریں گے۔بعد ازاں ان کی امریکا روانگی بھی جلد متوقع ہے۔
وزیر خارجہ شاہ محمود قریشی وزیر اعظم عمران خان کی ہدایت پر خطے کے اہم ممالک کے دورے پر روانہ ہوئے ہیں جبکہ اس موقعے پر سیکریٹری خارجہ سہیل محمود کے ساتھ ساتھ وزارتِ خارجہ حکام کا ایک وفد ان کے ہمراہ ہے۔
مزید پڑھیں: شاہ محمود قریشی ایران اور سعودی عرب کے دورے پر روانہ
