مظفر آباد: آزاد کشمیر کے صدر سردار مسعود خان کے مطابق کورونا وائرس مقبوضہ کشمیر کے مظلوم عوام کو شہداء سے وابستگی سے نہیں روک سکا۔
سماجی رابطے کی ویب سائٹ ٹوئٹر پر اپنے پیغام میں آزاد کشمیر کے صدر سردار مسعود خان نے کہا کہ مقبوضہ کشمیر کے علاقے سو پور میں ہزاروں کشمیری جن میں زیادہ تر نوجوان اور خواتین شامل تھے، شہید سجاد ڈار کے جنازے میں شریک ہوئے۔
آزاد کشمیر کے صدر سردار مسعود خان نے کہا کہ سجاد ڈار کو قابض بھارتی فوج نے شہید کیا تھا جبکہ مقبوضہ کشمیر میں فوج کی ریاستی دہشت گردی اور کورونا وائرس کے باعث کیا گیا لاک ڈاؤن جاری ہے جس کی کشمیری عوام نے کوئی پرواہ نہیں کی۔
صدرِ آزاد کشمیر نے کہا کہ بھارتی فوج کی طرف سے عائد کرفیو اور لاک ڈاؤن کی خلاف ورزی سے صاف ظاہر ہے کہ مظلوم کشمیری اپنی زندگی کو داؤ پر لگا کر بھی ایک شہید کے ساتھ اپنی وابستگی کو ظاہر کرکے رہتے ہیں۔ یہ ان کی عزم و ہمت کا ثبوت ہے۔
In Sopore, #IOJK, thousands Kashmiris, mostly youth and women, attended the funeral of Sajjad Dar killed by occupation forces. Defiance of the military siege and coronavirus lockdown shows how Kashmiris risk their life and limb to express solidarity with a martyr.
— Masood Khan (@Masood__Khan) April 10, 2020