کرپٹو کرنسی، اربوں روپے کے بٹ کوائنز کچرے میں پھینکنے والا شخص جو اب انھیں ڈھونڈنا چاہتا ہے؟

18 کروڑ ڈالرز سے زائد مالیت کے بٹ کوائنز پر مبنی ہارڈ ڈرائیو کو غلطی سے پھینک دینے والے کمپیوٹر انجینئر نے ان کی تلاش کے لیے آرٹی فیشل ٹیکنالوجی کا سہارا لینے کا فیصلہ کیا ہے۔

تفصیلات کے مطابق 37 سالہ جیمز ہویلز نے 2013 میں دفتری صفائی کے دوران ایک پرانے لیپ ٹاپ سے ہارڈ ڈرائیو کو الگ کیا تھا جس میں 8 ہزار بٹ کوائنز موجود تھے۔

تاہم، اب 9 سال بعد مانا جاتا ہے کہ وہ ہارڈ ڈرائیو ساؤتھ ویلز کے علاقے نیو پورٹ میں کچرا پھینکنے کے ایک مقام یا لینڈ فل میں کہیں موجود ہے جہاں ہزاروں ٹن کچرا موجود ہے۔

واضح رہے کہ مقامی انتظامیہ نے اس سے قبل 37 سالہ کمپیوٹر انجینئر کی اس مقام پر ہارڈ ڈرائیو تلاش کرنے کی متعدد درخواستوں کو مسترد کیا تھا۔

مگر حال ہی میں جیمز ہویلز نے تجویز دی ہے کہ اے آئی ٹیکنالوجی کے ذریعے ایک مکینکل ہاتھ کو استعمال کرکے کچرے کو فلٹر کیا جائے۔

اس منصوبے کے مطابق جیمز ہویلز کی جانب سے کئی ماحولیاتی اور ڈیٹا ریکوری ماہرین کی خدمات حاصل کی جائے گی جبکہ اس تلاش کے دوران روبوٹ کتوں کو سکیورٹی کے لیے تعینات کیا جائے گا تاکہ کوئی اس قیمتی ہارڈ ڈرائیو کو چوری نہ کرسکے۔

یہ بھی پڑھیں:

لاہور میں انڈوں کی قیمت 200 روپے فی درجن ہوگئی

جیمز ہویلز نے کہا کہ کچرے سے بھرے مقام کی کھدائی ایک بڑا آپریشن ہوتا ہے، اس کے لیے فنڈنگ حاصل کرلی گئی ہے، ہم نے ایک اے آئی ماہر کی خدمات بھی حاصل کرلی ہے، اس ٹیکنالوجی سے ہم آسانی سے ایک ہارڈ ڈرائیو کو تلاش کرسکتے ہیں۔

انہوں نے کہا کہ ہم نے ایک ماحولیاتی ٹیم کی خدمات بھی حاصل کی ہے، ہماری ٹیم متعدد ماہرین پر مشتمل ہے اور اس طرح ہم یہ کام کرنے کے قابل ہوگئے ہیں۔

ان کایہ بھی ماننا ہے کہ اس تلاش میں 9 سے 12 ماہ لگ سکتے ہیں، مگر ابھی مقامی انتظامیہ سے اجازت حاصل کرنا باقی ہے، جس کے ملنے کے بعد بھی ضمانت نہیں کہ کامیابی مل سکتی ہے یا ہارڈ ڈرائیو سے بٹ کوائنز کو ریکور بھی کیا جاسکتا ہے۔

لیکن اگر سب کچھ ٹھیک رہا تو جیمز ہویلز کی جانب سے اس رقم کو نیوپورٹ کی آبادی کی مدد اور کرپٹو کرنسی پراجیکٹس پر لگانے کا وعدہ کیا گیا ہے۔

دوسری جانب نیو پورٹ سٹی کونسل کے ایک ترجمان نے بتایا کہ اس جگہ کا انتظام سنبھالنا ہمارا فرض ہے، کچرے کے مقام پر کھوج سے ماحولیاتی خطرات پیدا ہوسکتے ہیں اور اس کو ہم قبول نہیں کرسکتے، اسی لیے ہم اجازت دینے کا فیصلہ نہیں کرسکتے۔