گوگل نیوز پر ہمیں فالو کریںکراچی: اینٹی وائلنٹ کرائم سیل (اے وی سی سی) نے ڈیفنس خیابان مومن، فیز 5 گزری میں بڑی کارروائی کرتے ہوئے ملزم ارمغان کے والد کامران قریشی کو گرفتار کر لیا۔
ذرائع کے مطابق اے وی سی سی نے خفیہ اطلاعات پر کارروائی کرتے ہوئے خیابان مومن میں ایک رہائش گاہ پر چھاپہ مارا، جہاں سے کامران قریشی کو حراست میں لیا گیا۔
پولیس حکام کے مطابق کامران قریشی پر الزام ہے کہ وہ اپنے بیٹے ارمغان کے غیر قانونی سرگرمیوں میں ملوث ہونے کے باوجود نہ صرف اسے تحفظ فراہم کر رہا تھا بلکہ مبینہ طور پر مالی معاونت بھی کرتا رہا۔
کامران قریشی کا بیٹا ارمغان پہلے ہی متعدد سنگین مقدمات میں مطلوب ہے، جن میں مالی فراڈ، منشیات فروشی، اور غیر قانونی کاروباری لین دین شامل ہیں۔
ذرائع کے مطابق، ارمغان نہ صرف بیرون ملک سے غیر قانونی ذرائع سے رقم حاصل کرتا تھا بلکہ وہ ان پیسوں کو ملک میں غیر قانونی سرمایہ کاری کے لیے بھی استعمال کر رہا تھا۔
پولیس کے مطابق ابتدائی تحقیقات میں یہ انکشاف ہوا ہے کہ کامران قریشی کو اپنے بیٹے کی سرگرمیوں کے بارے میں مکمل آگاہی تھی اور وہ اسے سہولت فراہم کرنے میں بھی ملوث پایا گیا ہے۔ مزید تحقیقات کے لیے ملزم کو نامعلوم مقام پر منتقل کر دیا گیا ہے۔
ذرائع کا کہنا ہے کہ اس کیس میں مزید گرفتاریاں بھی متوقع ہیں کیونکہ ارمغان کے ساتھ کئی بااثر شخصیات اور کاروباری افراد کے روابط سامنے آئے ہیں۔ قانون نافذ کرنے والے ادارے اس نیٹ ورک کو بے نقاب کرنے کے لیے مزید چھاپے مارنے کی تیاری کر رہے ہیں۔
یہ گرفتاری ایسے وقت میں سامنے آئی ہے جب شہر میں مالی جرائم اور غیر قانونی سرگرمیوں کے خلاف کریک ڈاؤن میں تیزی لائی جا رہی ہے۔ اس سے قبل بھی مختلف کارروائیوں میں کئی ملزمان کو گرفتار کیا جا چکا ہے۔
پولیس کا کہنا ہے کہ ایسے عناصر کے خلاف سخت کارروائی جاری رہے گی۔مزید تحقیقات کے بعد اس کیس میں مزید اہم انکشافات متوقع ہیں۔
