گوگل نیوز پر ہمیں فالو کریںشارجہ: افغانستان نے دوسرے ٹی ٹوئنٹی میچ میں پاکستان کو 7 وکٹوں سے شکست دے کر سیریز 2-0 سے اپنے نام کرلی۔
افغانستان نے کسی بھی انٹرنیشنل میچ میں دوسری بارپاکستان کے خلاف کامیابی حاصل کی ہے اور سیریز میں یہ اُن کی پہلی کامیابی ہے۔
گزشتہ روز کھیلے گئے میچ میں پاکستان کی جانب سے دیا گیا 131 رنز کا ہدف افغان ٹیم نے 3 وکٹوں کے نقصان پر آخری اوور میں حاصل کرلیا، افغانستان کے رحمان اللہ گرباز 44، ابراہیم زادران 38 رنز بناکر نمایاں رہے جبکہ نجیب اللہ زادران 23 اور محمد نبی 14 رنز بناکر ناٹ آؤٹ رہے، پاکستان کی طرف سے زمان خان اور احسان اللہ نے ایک، ایک وکٹ حاصل کی۔
دوسرے ٹی ٹوئنٹی میچ میں کپتان شاداب خان نے ٹاس جیت کر پہلے بیٹنگ کا فیصلہ کیا تھا لیکن پاکستان کا ٹاپ آرڈر افغان بولرز کے سامنے ایک بار پھر ریت کی دیوار ثابت ہوا۔ پاکستان ٹیم مقررہ 20 اوورز میں 6 وکٹوں کے نقصان پر صرف 130 رنز ہی بناسکی۔
افغانستان سے ہار کی اصل وجہ کیا تھی؟ شاداب خان نے بتادیا
پاکستان کی طرف سے اوپنر صائم ایوب اور محمد حارث بیٹنگ کیلئے آئے مگر پہلے اوور کی دوسری گیند پر صائم ایوب کھاتا کھولے بغیر پویلین لوٹ گئے، اگلی ہی گیند پر عبداللہ شفیق بھی بغیر کوئی رن بنائے آؤٹ ہوگئے۔
تیسرے اوور میں 20 رنز کے مجموعی اسکور پر محمد حارث بھی 15 رنز بناکر چلتے بنے، طیب طاہر 13 اور اعظم خان 1 رن بناکر پویلین لوٹ گئے، عماد وسیم اور کپتان شاداب خان نے پاکستان کی بیٹنگ لائن کو سہارا دیا، عماد وسیم 64 رنز بناکر ناٹ آؤٹ رہے جبکہ شاداب خان اننگز کی آخری گیند پر رن لینے کی کوشش میں 32 رنز بناکر آوٹ ہوگئے۔
افغانستان کی طرف سے فضل الحق فاروقی نے 2 جبکہ راشد خان، کریم جنت اور نوین الحق نے ایک، ایک وکٹ حاصل کی۔
قومی کرکٹ ٹیم نے دوسرے ٹی20 میچ کیلئے محمد نواز کی جگہ فہیم اشرف کو فائنل الیون میں شامل کیا تھا جبکہ دیگر کھلاڑیوں میں کپتان شاداب خان، محمد حارث، عبداللہ شفیق، اعظم خان، فہیم اشرف، عماد وسیم، زمان خان، احسان اللہ، طیب طاہر، نسیم شاہ اور صائم ایوب شامل تھے۔
قبل ازیں پہلے ٹی20 میچ میں افغانستان نے پہلی بار پاکستان کو شکست دی تھی۔ یہ افغانستان کی پاکستان کے خلاف کسی بھی بین الاقوامی میچ میں پہلی فتح تھی۔
واضح رہے کہ سیریز کا تیسرا اور آخری میچ 27 مارچ شارجہ کرکٹ اسٹیڈیم میں ہی کھیلا جائے گا۔
