گوگل نیوز پر ہمیں فالو کریںکراچی کے علاقے لیاری میں پولیس اہلکاروں کی جانب سے دکاندار سے بھتا وصولی کا انکشاف ہوا ہے۔
ذرائع ابلاغ کی رپورٹس کے مطابق لیاری میں دکاندار سے بھتہ طلبی پر دکاندار محمد فہد نے پولیس اہلکاروں کیخلاف مقدمے کے اندراج کے لیے درخواست سیشن عدالت میں دائر کردی۔
درخواست میں ایس ایس پی کمپلینٹ سیل اور ایس ایچ او کلاکوٹ کو فریق بنایا گیا۔ درخواست میں پولیس اہلکار شوکت، ساجد، بلال اور سراج کو ملزم نامزد کیا گیا ہے۔
درخواست گزار نے موقف اختیار کیا ہے کہ لیاری جھٹ پٹ مارکیٹ میں کنفکشنری اور پان کے سامان کی دکان چلاتا ہوں، پولیس اہلکار میری دکان پر آئے اور ہفتہ وار بھتا ادائیگی کا کہا جو میں نے منع کردیا۔
انہوں نے کہا کہ 13 جولائی کو دوبارہ میری دکان پر آئے اور مجھے تھانہ چاکیواڑہ لے گئے، تھانے لیجاکر میری دکان میں رکھی ایک لاکھ روپے سے زائد کی رقم بھی ہتھیالی اور بھتا ادائیگی سے منع کرنے پر مجھ پر گٹکا برآمدگی کا جھوٹا مقدمہ بھی درج کرادیا۔
دکاندار کے مطابق ضمانت لیکر جیل سے رہا ہوا تو پولیس والے دوبارہ بھتا مانگ رہے ہیں اور ہراساں کررہے ہیں، بھتا نہ دینے پر دوبارہ منشیات برآمدگی کے مقدمات میں گرفتار کرنے کی دھمکیاں دی جارہی ہیں۔
پولیس والے کیخلاف اعلیٰ حکام اور تھانے میں شکایت کرنے پر بھی کوئی کارروائی نہیں کر رہے، ملزم پولیس اہلکاروں کیخلاف مقدمہ اندراج کا حکم دیا جائے۔
