شمالی وزیرستان میں آپریشن، فائرنگ کا تبادلہ، دو دہشت گرد ہلاک

پشاور: شمالی وزیرستان کے علاقے دتہ خیل میں انٹیلی جنس بیسڈ آپریشن کے دوران دو دہشت گرد مارے گئے۔

انٹر سروسز پبلک ریلیشنز کے مطابق سیکورٹی فورسز نے قبائلی ضلع کے علاقے دتہ خیل میں دہشت گردوں کی موجودگی کی اطلاع پر کارروائی کی۔

شدید فائرنگ کے تبادلے میں دو دہشت گرد مارے گئے۔ ایک کی شناخت عصمت اللہ عرف حافظ کے نام سے ہوئی جب کہ دوسرے دہشت گرد کی شناخت کی جا رہی ہے۔

دہشت گردوں سے ہتھیاروں اور گولہ بارود کا ایک بڑا ذخیرہ بھی برآمد کیا گیا ہے جس میں سب مشین گنز، ہینڈ گرنیڈ اور کثیر تعداد میں کیلیبر راؤنڈز شامل ہیں۔ ہلاک دہشت گرد سیکورٹی فورسز کے خلاف دہشت گردی کی کارروائیوں، ٹارگٹ کلنگ اور اغوا برائے تاوان میں ملوث تھے۔

مزید پڑھیں:پاکستان میں دہشتگردی اور عالمی منظرنامہ

حال ہی میں سیکورٹی فورسز نے صوبہ خیبر پختونخواکے ضلع جنوبی وزیرستان میں دہشت گردوں کے ایک ٹھکانے پر چھاپے کے دوران ہتھیاروں اور آئی ای ڈی کی تیاری کے مواد کا ایک بڑا ذخیرہ برآمد کیا تھا۔

26 جنوری کو بھی سیکورٹی فورسز نے شمالی وزیرستان کے علاقے اسپن وام میں دہشت گردوں کی موجودگی پر انٹیلی جنس بیسڈ آپریشن کیا۔ شدید فائرنگ کے تبادلے کے دوران دہشت گرد صدام مارا گیا۔ اس کے قبضے سے بھاری مقدار میں اسلحہ اور گولہ بارود بھی برآمد ہوا ہے۔