گوگل نیوز پر ہمیں فالو کریںسعودی عرب کے پبلک انویسٹمنٹ فنڈ (PIF) نے اپنی ذیلی کمپنی ایار تھرڈ انویسٹمنٹ کے ذریعے الیکٹرک گاڑیاں بنانے والی کمپنی لوسڈ گروپ میں 550 ملین ڈالر کی نئی سرمایہ کاری کا اعلان کیا ہے۔ یہ قدم ایسے وقت میں سامنے آیا ہے جب کمپنی اپنی روبوٹیکسی سروس کے منصوبوں کو مزید وسعت دے رہی ہے۔
اس معاہدے کے تحت امریکی آٹو کمپنی کو ایک بڑے عالمی روبوٹیکسی نیٹ ورک کیلئے کم از کم 35 ہزار گاڑیاں فراہم کرنے کا ہدف دیا گیا ہے۔
ان دونوں سرمایہ کاریوں کا مجموعی مقصد لوسڈ کی مالی پوزیشن کو مضبوط بنانا ہے تاکہ وہ اپنی سافٹ ویئر بیسڈ گاڑیوں کی ٹیکنالوجی کو آگے بڑھا سکے اور پیداوار کی صلاحیت کو بہتر کر سکے جس میں سعودی عرب میں موجود اس کی فیکٹریاں بھی شامل ہیں۔
یہ معاہدہ ان متعدد سرمایہ کاریوں کا تسلسل ہے جن کی قیادت پی آئی ایف کرتا رہا ہے۔ یہ فنڈ کمپنی کا سب سے بڑا شیئر ہولڈر بھی ہے اور اس نے ہمیشہ لوسڈ کو مالی سہارا دیا ہے تاکہ کمپنی اپنی پیداوار کو بڑھا سکے اور مالی استحکام برقرار رکھے۔
یہ سرمایہ کاری سعودی عرب کی طویل المدتی صنعتی حکمتِ عملی کے مطابق ہے جس کا مقصد ملک میں الیکٹرک گاڑیوں کی تیاری اور جدید ٹیکنالوجی کو فروغ دینا ہے تاکہ معیشت کو تیل کے انحصار سے کم کیا جا سکے۔
لوسڈ کے عبوری سی ای او مارک ونٹرہوف نے کہا کہ یہ اعلان اوبر کے ساتھ تعلقات کی مضبوطی اور پی آئی ایف کے ساتھ مسلسل شراکت داری کو ظاہر کرتا ہے جبکہ کمپنی کی سافٹ ویئر بیسڈ ای وی ٹیکنالوجی مستقبل کی نقل و حرکت کے نظام میں اہم کردار ادا کرے گی۔
انہوں نے مزید کہا کہ لوسڈ گراویٹی پلیٹ فارم کی پیش رفت کو بنیاد بنا کر درمیانی سائز کے نئے ماڈل کے ذریعے خودکار نقل و حمل کو بڑے پیمانے پر ممکن بنایا جا سکے گا جس میں لاگت میں کمی اور مینوفیکچرنگ کی سادگی شامل ہوگی۔
ونٹرہوف کے مطابق یہ پیش رفت اوبر اور نورو کے ساتھ شراکت میں ایک اور اہم سنگ میل ہے اور آنے والے سالوں میں اس تعاون کو مزید بڑھایا جائے گا۔
ایار تھرڈ انویسٹمنٹ کمپنی کی جانب سے 550 ملین ڈالر کی سرمایہ کاری کنورٹیبل پریفرڈ اسٹاک کی خریداری کے ذریعے کی جائے گی جسے لوسڈ نے پی آئی ایف کے ساتھ اسٹریٹجک شراکت داری کی توسیع قرار دیا ہے۔
اس کے علاوہ اوبر نے بھی مزید 200 ملین ڈالر کی سرمایہ کاری کا وعدہ کیا ہے جس کے بعد اس کی مجموعی سرمایہ کاری بڑھ کر 500 ملین ڈالر تک پہنچ گئی ہے۔
اوبر اس کے ساتھ ساتھ اپنی گاڑیوں کی خریداری کے ہدف کو بھی بڑھا رہا ہے تاکہ روبوٹیکسی منصوبے کو مزید تیزی دی جا سکے۔
لوسڈ کے مطابق یہ توسیع شدہ شراکت پہلے سے موجود معاہدوں پر مبنی ہے جو اوبر اور خودکار ڈرائیونگ کمپنی نورو کے ساتھ کیے گئے تھے اور اس کا آغاز اس سال کے آخر تک سان فرانسسکو بے ایریا میں متوقع ہے۔
ابتدائی مرحلے میں اس سروس کے لیے لوسڈ گراویٹی ماڈل استعمال کیا جائے گا جبکہ مستقبل میں کمپنی کا نیا درمیانی سائز کا پلیٹ فارم بھی شامل کیا جائے گا۔
اوبر کے سی ای او دارا خسروشاہی نے کہا کہ بڑھتی ہوئی سرمایہ کاری لوسڈ کی ٹیکنالوجی اور عملدرآمد پر اعتماد کی علامت ہے اور اس سے بڑے پیمانے پر گاڑیوں کی تعیناتی ممکن ہوگی۔
انہوں نے مزید کہا کہ یہ حکمت عملی تیزی کے ساتھ مگر سمجھداری سے روبوٹیکسی سروس کو عالمی سطح پر پھیلانے کے لیے ضروری ہے تاکہ یونٹ اکنامکس بہتر بنائی جا سکیں۔
لوسڈ کا آنے والا درمیانی سائز کا پلیٹ فارم اس شراکت داری میں مرکزی کردار ادا کرے گا جو کم بیٹری سائز کے باوجود زیادہ رینج، کم لاگت اور بہتر اندرونی جگہ فراہم کرنے کے لیے ڈیزائن کیا جا رہا ہے۔
کمپنی کا کہنا ہے کہ ان گاڑیوں کی ابتدائی قیمت 50 ہزار ڈالر سے کم رکھنے کا ہدف ہے تاکہ یہ صارفین اور فلیٹ دونوں مارکیٹس کے لیے موزوں ہوں۔
