کراچی میں کورونا پھیل گیا، اومی کرون بھی بے قابو،اسکول بند، کاروبار محدود، سخت پابندیوں کی تیاریاں 

کراچی :حکومت سندھ نے کورونا وائرس اور اومی کرون کے کیسز میں اضافے کے بعد صوبے کے متعدد اضلاع میں اسکول بند کرنے جبکہ کاروباری اوقات میں کمی سمیت دیگر پابندیوں پر غور شروع کردیا ہے۔

کراچی میں کورونا کی شرح 8اعشاریہ 9 فیصد تک پہنچنے کی وجہ سے حکومت نئی قسم کے پھیلاؤ کو روکنے کے لیے کاروباری اوقات محدود کرنے پر بھی غور کر رہی ہے ۔امکان ہے کہ حکام آئندہ دو سے تین دنوں میں کورونا وائرس سے متعلق پابندیوں کو دوبارہ نافذ کرنے کے بارے میں فیصلہ کرلیا جائیگا۔

دوسری جانب نیشنل کمانڈ اینڈ آپریشن سینٹر (این سی او سی) کے جاری کردہ اعدادوشمار کے مطابق ملک بھر میں مجموعی طور پر کورونا سے 12 لاکھ 97ہزار 865افراد متاثر جبکہ وائرس میں مبتلا 28 ہزار 945شہری جان کی بازی ہار گئے۔

مزید پڑھیں:ویاگرا سے کورونا کا علاج ، ممنوعہ دوا نے خاتون کی جان بچالی

کورونا کی تشخیص کیلئے گزشتہ 24 گھنٹوں کے دوران 44ہزار198ٹیسٹ ہوئے، مجموعی ٹیسٹس 2 کروڑ35 لاکھ 58ہزار972 ہوگئے۔ ملک بھر میں کورونا ٹیسٹ کا نتیجہ مثبت آنے کی شرح 1.42فیصد رہی جبکہ 641مریض انتہائی نگہداشت میں ہیں۔

گزشتہ 24 گھنٹوں کے دوران ملک بھر میں کورونا کو 187افراد نے شکست دی جس سے صحتیاب افراد کی مجموعی تعداد 12 لاکھ 57 ہزار355 ہو گئی۔وائرس کے فعال کیسز 10 ہزار 184 اور شرحِ اموات 2.2فیصد پر برقرار ہے۔

سب سے زیادہ کورونا کیسز سندھ میں جبکہ اموات پنجاب میں رپورٹ ہوئیں۔ پنجاب میں 4 لاکھ 45 ہزار 630افراد وائرس کا شکار جبکہ 13 ہزار 75جاں بحق ہوگئے۔ سندھ میں کورونا کے 4 لاکھ 83 ہزار 165کیسز اور 7 ہزار 673اموات رپورٹ ہوئیں۔