چیئرمین پی سی بی کا قومی ٹیم کے اعزاز میں تقریب منعقد کرنیکا فیصلہ

لاہور: چیئرمین پی سی بی رمیز راجہ نے قومی ٹیم کے اعزاز میں تقریب منعقد کرنے کا فیصلہ کیا ہے جس کے دوران ٹی 20 ورلڈ کپ میں کھلاڑیوں کی شاندار کارکردگی کو سراہا جائے گا۔

تفصیلات کے مطابق کرکٹ بورڈ کے چیئرمین رمیز راجہ نے جمعہ کے روز قومی ٹیم کے اعزاز میں ایک تقریب منعقد کرنے کی منصوبہ بندی کرلی جس میں تمام کھلاڑیوں کو یکجا کیا جائے گا۔

یہ بھی پڑھیں:

ٹیسٹ اوپنر عابد علی کی کرکٹ میں بتدریج واپسی کا سفر جاری

کرکٹ بورڈ کا ٹیم کی بہتر کارکردگی کیلئے غیر ملکی کوچز لانے کا فیصلہ

اعزازیہ تقریب میں ٹی 20 ورلڈ کپ اسکواڈ کو مدعو کیا جائے گا۔ چیئرمین رمیز راجہ کے فیصلے کے تحت کل منعقد کی جانے والی تقریب کا مقصد کھلاڑیوں کی کارکردگی اجاگر کرنا ہے۔

نجی ٹی وی ذرائع کا کہنا ہے کہ چیئرمین پی سی بی رمیز راجہ نے اعزازیہ تقریب کے دوران قومی کرکٹ ٹیم کے کھلاڑیون کو کیش انعام سے بھی نوازنے کا فیصلہ کیا ہے۔

قبل ازیں قومی کرکٹ ٹیم نے ٹی 20 ورلڈ کپ میں سیمی فائنل تک ناقابلِ شکست رہ کر ساری دنیا کو حیران کردیا۔ تماشائیوں کو زیادہ حیرت تب ہوئی جب پاکستان نے بھارت کو شکست دی۔

دیگر میچز کے دوران قومی ٹیم نے اتنی شاندار کارکردگی نہیں دکھائی جتنی کہ بھارت کے خلاف دکھائی۔ اپنے افتتاحی میچ میں پاکستان نے بھارت کو 10وکٹوں سے ہرایا۔

خیال رہے کہ اس سے قبل کرکٹ بورڈ نے قومی ٹیم کی کارکردگی بہتر کرنے کیلئے غیر ملکی کوچز تعینات کرنے کا فیصلہ کیا ہے۔رمیز راجہ نے کہا کہ میں بابر اعظم سے بات کرچکا ہوں۔

نئے سال کے آغاز پر چیئرمین پی سی بی رمیز راجہ نے کہا کہ کوچز کی تقرری پر ٹیم کے کپتان اور ثقلین مشتاق سے بھی بات چیت ہوئی۔ عام رائے یہ ہے کہ غیر ملکی کوچز لانے چاہئیں۔